قومی کرکٹ ٹیم کے کپتان بابر اعظم نے کہا ہے کہ کبھی کسی کی باتوں میں آ کر اپنی حکمت عملی تبدیل نہیں کی۔

تفصیلات کے مطابق لاہور میں ہونے والی پریس کانفرنس میں قومی کرکٹ ٹیم کے کپتان بابر اعظم نے کہا کہ میں اپنی حکمت عملی کسی کے کہنے پر تبدیل نہیں کرتا۔

بابر اعظم نے کہا کہ نیوزی لینڈ کے خلاف سیریز جیتے کے لیے پرعزم ہیں۔

انہوں نے کہا کہ انجری کھیل کا حصہ ہے جو کبھی بھی کسی کو بھی ہو سکتی ہے۔

ایک سوال کے جواب میں بابر اعظم نے کہا کہ کبھی بھی کسی کی باتوں میں آ کر اپنی حکمت عملی تبدیل نہیں کرتا، کوشش کرتے ہیں کہ ٹیم کے لیے جو سب سے بہتر ہو وہ کریں۔

انہوں نے کہا کہ کبھی ایسا نہیں کیا کہ فٹنس پر دھیان نہ دیا ہو، محمد رضوان فائٹر ہیں امید ہے کہ آئرلینڈ کیخلاف سیریز تک فٹ ہو جائیں گے۔

بابر اعظم کا کہنا تھا کہ کوشش ہے کہ ورلڈ کپ کے لیے ہر کھلاڑی تیار ہو، رضوان کو فٹنس بحالی کے لیے 2 میچ میں آرام دینے کا فیصلہ کیا ہے۔

قومی کرکٹ ٹیم کے قائد نے کہا کہ سیریز کا مقصد یہی ہے کہ زیادہ سے زیادہ کھلاڑیوں کو موقع ملے۔

کپتان بابر اعظم کے مطابق تمام کھلاڑیوں کو اعتماد میں لیکر فیصلے کیے جا رہے ہیں، اپنے کھلاڑیوں پر پورا یقین ہے کہ وہ اچھا کھیلیں گے۔

نیوزی لینڈ کے خلاف تیسرے ٹی ٹوئنٹی میں شکست پر بابر اعظم نے کہا کہ بطور ٹیم جیتتے بھی ہیں اور ہارتے بھی ہیں۔

کپتان بابر اعظم نے مزید کہا کہ تیسرے ٹی 20 میں بیٹنگ، بولنگ کے ساتھ فیلڈنگ بھی اچھی نہیں ہوئی، اگر کیچ پکڑ لیتے تو نتیجہ مختلف ہوتا۔

نیوزی لینڈ کے خلاف چوتھے ٹی ٹوئنٹی سے قبل پاکستانی کیمپ میں محمد رضوان کے بعد عرفان خان نیازی بھی ہیمسٹرنگ انجری کا شکار ہو گئے ہیں۔

ذرائع کے مطابق محمد رضوان اورعرفان نیازی کی رپورٹس گزشتہ روز میڈیکل پینل کو موصول ہو گئی ہیں، رپورٹس کے معائنہ کے بعد محمد رضوان اورعرفان نیازی سیریز کے بقیہ 2 میچز میں آرام کریں گے۔

پی سی بی ذرائع کے مطابق محمد رضوان، عرفان خان نیازی نیشنل کرکٹ اکیڈمی میں ری ہیب کاعمل جاری رکھیں گے۔