صدر فیڈریشن آف پاکستان چیمبر آف کامرس اینڈ انڈسٹری نے اسمگلنگ کی روک تھام کے لئے بارڈر مینجمنٹ نظام کو مزید فعال کرنے کا مطالبہ کردیا۔

صدر فیڈریشن آف پاکستان چیمبر آف کامرس اینڈ انڈسٹری عاطف اکرام شیخ نے کہا ہے کہ حکومت  اسمگلنگ کی روک تھام کیلئے بارڈر مینجمنٹ نظام کو مزید فعال کرے۔

انہوں نے کہا کہ اسمگل شدہ اشیاء کی ملک میں نقل و حرکت ٹیکس محصولات کو متاثر کررہی ہے، اسمگلنگ کی روک تھام کے ذریعے ہی ٹیکس محصولات میں اضافہ ممکن ہے۔

عاطف اکرام کہتے ہیں کہ ہم آئندہ مالی سال کے بجٹ میں نان فائلرز کے خلاف حکومتی اقدامات کی حمایت کرتے ہیں جو لوگ ٹیکس نیٹ میں نہیں ان سے ٹیکس وصول کیا جائے۔

صدر فیڈریشن نے کہا کہ آئندہ مالی سال میں حقیقت سے قریب ٹیکس ہدف رکھا جائے، بزنس کمیونیٹی ٹیکس نیٹ بڑھانے میں حکومت کی مدد کیلئے تیار ہیں۔

ان کا کہنا تھا کہ اسٹاک مارکیٹ میں بہتری سے سرمایہ کاروں کا اعتماد بحال ہوا ہے، ہمارے زرمبادلہ ذخائر میں بھی اضافہ ہورہا ہے جو معیشت کی سمت درست ہونے کا ثبوت ہے۔

عاطف اکرام نے مزید کہا کہ ہمارا مطالبہ ہے کہ ملکی معیشت کی مضبوطی کیلئے مزید سرمایہ کار دوست پالیسیوں کی ضرورت ہے جس کیلئے آئندہ بجٹ میں ٹیکس دہندگان پر مزید بوجھ نہ ڈالا جائے اور بزنس کمیونیٹی کے نمائندہ اداروں اور اسٹیک ہولڈرز کی تجاویز کو بجٹ میں شامل کیا جائے۔