آئی سی سی ٹی 20 ورلڈ کے سپر 8 مقابلے میں جنوبی افریقہ نے میگا ایونٹ کے سیمی فائنل کے لیے کوالیفائی کر لیا ہے۔

جنوبی افریقہ نے میزبان ملک ویسٹ انڈیز کو سپر 8 مرحلے کے اہم میچ میں 3 وکٹوں سے شکست دی۔

جنوبی افریقہ نے ٹاس جیت کر ویسٹ انڈیز کو پہلے بیٹنگ کی دعوت دی، ویسٹ انڈیز نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 135 رنز بنائے۔

جنوبی افریقہ کو ہدف کے تعاقب میں ہی 15 رنز پر دو کھلاڑیوں کا نقصان اٹھانا پڑا، جس کے بعد میچ میں بارش کی وجہ سے کھیل تعطل کا شکار ہوا، تاہم کھیل جب دوبارہ شروع ہوا تو جنوبی افریقہ کو جیت کے لیے 17 اوورز میں 123 رنز کا ہدف ملا۔

کپتان ایڈم مارکرم نے 18 رنز بنائے، ٹرسٹن اسٹبز 29 اور ہینرچ کلاسن نے 22 رنز کی اننگز کھیلی، جبکہ مارکو جینسن نے ناقابل شکست 21 رنز بنا کر جیت میں اہم کردار ادا کیا۔

ویسٹ انڈیز کے روسٹن چیس نے 3 وکٹیں حاصل کیں۔

اس سے قبل ویسٹ انڈیز نے اپنی اننگز کا آغاز کیا تو پہلی وکٹ 2 رنز پر گری، شائے ہوپ صفر پر آؤٹ ہوئے، کائل میئرز نے 35 رنز بنائے۔

روسٹن چیس نے 52 رنز کی اننگز کھیلی جبکہ آندرے رسل 15 رنز بنا سکے۔

جنوبی افریقہ کی جانب سے شمس تبریزی نے 3 کھلاڑیوں کو آؤٹ کیا۔

میگا ایونٹ کا 50 واں میچ سر ویوین رچرڈز کرکٹ اسٹیڈیم نارتھ ساؤنڈ اینٹیگا میں کھیلا گیا۔