صدر ایف پی سی سی آئی عاطف اکرام شیخ نے پاکستان کے لیے عالمی سطح پر بڑا اعزاز اپنے نام کر لیا ہے۔

تفصیلات کے مطابق صدر ایف پی سی سی آئی عاطف اکرام شیخ کو کنفیڈریشن آف ایشیا پیسیفک چیمبر آف کامرس اینڈ انڈسٹری (CACCI) کا نائب صدر منتخب کر لیا گیا ہے۔

عاطف اکرام شیخ کی بطور نائب صدر کی تقرری سنگاپور میں منعقدہ CACCIکے 38ویں سالانہ اجلاس کے موقع پر عمل میں آئی۔

صدرفیڈریشن آف پاکستان چیمبرز آف کامرس اینڈ انڈسٹری عاطف اکرام نے بطور نائب صدر سی اے سی سی آئی تعیناتی پر فورم کا شکریہ ادا کیا۔

 اس موقع پر عاطف اکرام شیخ نے کہا کہ کنفیڈریشن آف ایشیا پیسیفک چیمبر آف کامرس اینڈ انڈسٹری جیسے اہم ترین تجارتی فورم پر پاکستان کی نمائندگی پر فخر ہے۔

انہوں نے کہا کہ بطور نائب صدر پاکستان اور ایشیا پیسفک ریجن کی بزنس کمیونٹی کے در میان تعلقات کے فروغ کیلئے کردار ادا کروں گا۔

ان کا کہنا تھا کہ ایشیا پیسفک ریجن پاکستان اور پوری دنیا کیلئے اہمیت کا حامل ہے اور کنکٹیویٹی کے فروغ کیلئے کاسی فورم کردار ادا کر سکتا ہے۔

کنفیڈریشن آف ایشیا پیسیفک چیمبر آف کامرس کا نائب صدر منتخب ہونا عالمی سطح پر پاکستان پر اعتماد کااظہار ہے۔

نومنتخب نائب صدر نے مزید کہا کہ اس کثیرالجہتی فورم میں متحرک کردار کرکے پاکستان کیلئے اقتصادی فوائد حاصل کرنیکی کوشش کرینگے۔

صدر ایف پی سی سی آئی عاطف اکرام شیخ نے مزید کہا کہ کاسی میں مختلف ممالک کے رکن چیمبرز کیساتھ پاکستان کے تجارتی تعلقات مضبوط کرنے کیلئے پرعزم ہیں۔