وزیراعلی پنجاب مریم نوازشریف کے محفوظ پنجاب ویژن کے مطابق پنجاب پولیس کی جانب سے ناجائز اسلحہ کے خلاف سخت کریک ڈاؤن جاری ہے۔

ترجمان پنجاب پولیس کا کہنا ہے کہ لاہورسمیت مختلف اضلاع میں ناجائز اسلحہ کے خاتمے کیلئے بلا تفریق کارروائیوں کے دوران بھاری تعداد میں اسلحہ برآمد کیا گیا۔ رواں سال لاہور سمیت صوبہ بھر میں ملزمان کے قبضہ سے 1581 کلاشنکوف، 39818 پسٹل برآمد ہوئے۔

 ترجمان پنجاب پولیس کے مطابق 3398 بندوقیں، 2982 رائفلز، 744 ریوالور بھی ملزمان کے قبضے سے برآمد کئے گئے، ملزمان سے لاکھوں کی تعداد میں تقریبا 03 لاکھ گولیاں اور کارتوس بھی برآمد کئے گئے۔

ترجمان کی جانب سے جاری بیان کے مطابق صوبائی دارالحکومت میں ملزمان کے قبضے سے 127 کلاشنکوف، 8543 پسٹل، 593 رائفلز، 323 بندوقیں اور 100 ریوالور برآمد کیا گیا۔ ملزمان کے قبضے سے تقریبا 48 ہزار گولیاں، سیکڑوں کارتوس بھی ملزمان کے قبضے سے برآمد کیے گئے۔

آئی جی پنجاب ڈاکٹرعثمان کی اسلحہ کی نمائش کرنے والے ملزمان کے خلاف بلا تفریق کاروائی کی ہدایت کی ہے، انھوں نے کہا کہ ہوائی فائرنگ میں ملوث ملزمان کے خلاف سخت قانونی کاروائی میں تاخیر نہ کی جائے، سوشل میڈیا اور ٹک ٹاک ویڈیوز میں اسلحہ کی تشہیر کرنے والے ملزمان کو بلا تفریق قانون کی گرفت میں لایا جائے۔

ترجمان پنجاب پولیس کا کہنا ہے کہ اسلحہ کے کاروبار میں ملوث ڈیلرز کے لائسنس، سٹاک انسپکشن کا عمل باقاعدگی سے سر انجام دیا جائے، آر پی اوز، ڈی پی اوز ناجائز اسلحہ کے کریک ڈاؤن کی ہفتہ وار رپورٹس سی پی او بھجوائیں۔