اسرائیل نے یمن کے حوثی کنٹرول شدہ صنعاء ایئرپورٹ پر فضائی حملہ کیا، جس میں یمنیہ ایئر لائنز کا آخری فعال طیارہ تباہ ہو گیا۔ یہ طیارہ حج کے لیے سعودی عرب جانے والے زائرین کو لے جانے والا تھا۔

مسافر طیارے پر حملے کی تصدیق اسرائیلی اور یمنی حکام نے کی ہے۔

صنعاء ایئرپورٹ کے ڈائریکٹر، خالد الشائف نے ایک ویڈیو شیئر کی، جس میں یمنیہ ایئر لائنز کا طیارہ تباہ ہو رہا تھا، اور اس سے کالا دھواں بلند ہو رہا تھا۔

انہوں نے بتایا کہ یہ طیارہ ایئرپورٹ کا آخری فعال طیارہ تھا، جو سعودی عرب جانے والے حجاج کو لے جانے والا تھا۔

مزید پڑھیں: یمن، حوثی باغیوں نے امریکی ڈرون مار گرایا

حوثی ٹی وی چینل کے مطابق اس فضائی حملے میں نہ صرف طیارہ تباہ ہوا بلکہ ایئرپورٹ کے رن وے کو بھی نقصان پہنچا۔ 17 مئی کو ایئرپورٹ نے محدود سروس بحال کی تھی، تاہم یہ حملہ یمن کی شہری فضائی سروسز کے لیے ایک اور بڑا دھچکا ثابت ہوا۔

اسرائیلی وزیر دفاع یوآو گالانٹ نے ایک بیان میں کہا کہ اسرائیلی فضائیہ نے حوثی باغیوں کے اہداف کو نشانہ بنایا ہے، کیونکہ ایک روز قبل حوثیوں نے اسرائیل پر دو میزائل داغے تھے۔

اسرائیلی فوج نے دعویٰ کیا کہ یہ طیارے حوثی باغیوں کو منتقل کرنے کے لیے استعمال ہو رہے تھے، جنہوں نے اسرائیل پر حملے کیے تھے۔

یمنیہ ایئر لائنز نے اپنے بیان میں بتایا کہ حملہ اس وقت ہوا جب طیارے پر حج کے لیے روانہ ہونے والے مسافر سوار ہونے والے تھے۔

مزید پڑھیں: امریکی فضائی حملے کے بعد حوثی باغیوں کا بڑا اعلان

اس حملے کے نتیجے میں نہ صرف ایک قیمتی طیارہ تباہ ہوا بلکہ ہزاروں حاجیوں کی سعودی عرب روانگی بھی متاثر ہو گئی۔

اقوام متحدہ کے خصوصی ایلچی ہانس گرونڈبرگ نے اس واقعے کو یمن اور پورے خطے کے لیے انتہائی نازک قرار دیا۔ ان کا کہنا تھا کہ یہ حملہ نہ صرف یمن کی فضائی سروسز پر اثر انداز ہو رہا ہے بلکہ پورے خطے میں انسانی بحران کو مزید پیچیدہ بنا رہا ہے۔

حوثیوں نے نومبر 2023 سے بحر احمر اور عدن خلیج میں جہازوں پر حملے شروع کر دیے تھے، جس کے بعد امریکہ اور برطانیہ نے جوابی کارروائیاں کیں۔

حالیہ مہینوں میں امریکہ اور حوثیوں کے درمیان جنگ بندی ہوئی تھی، تاہم حوثی اب بھی اسرائیل پر میزائل حملے جاری رکھے ہوئے ہیں۔