بھارت کی متنازع خارجہ پالیسی، بڑھتی ہوئی جنگی جنونیت اور غیر مستحکم تجارتی پالیسیوں پر امریکی صدر ڈونلڈ ٹرمپ نے شدید تحفظات کا اظہار کیا ہے۔

 انہوں نے ایپل کمپنی کے سی ای او کو خبردار کیا ہے کہ بھارت میں سرمایہ کاری خطرے میں پڑ سکتی ہے۔

ذرائع کے مطابق امریکی صدر نے ایپل کے سربراہ سے ملاقات میں کہا کہ آپ کی 500 بلین ڈالر کی سرمایہ کاری بھارت میں ڈوب سکتی ہے۔

بھارتی پالیسیوں پر شدید اعتراض کرتے ہوئے صدر ٹرمپ نے الزام لگایا کہ بھارت کی ٹیرف پالیسی نہ صرف غیرمنصفانہ ہے بلکہ اس نے امریکی کمپنیوں کو بھاری نقصان بھی پہنچایا ہے۔

مزید پڑھیں: امریکا کا پاکستان اور بھارت سے مسلح تصادم بند کرنے کا مطالبہ، ترجمان امریکی محکمہ خارجہ

ان کا کہنا تھا کہ مودی سرکار کی ناکام تجارتی حکمت عملی عالمی سرمایہ کاروں کو مایوس کر رہی ہے، اور بھارت اب قابلِ بھروسا تجارتی پارٹنر نہیں رہا۔

صدر ٹرمپ نے کہا کہ بھارت اپنی داخلی عدم استحکام، غیر شفافیت اور علاقائی کشیدگی کی وجہ سے خود اپنے لیے مسائل کھڑے کر رہا ہے، اور امریکا اس کا بوجھ مزید نہیں اٹھائے گا۔

صدر ٹرمپ نے بھارت پر دوبارہ اعتماد کرنے سے انکار کرتے ہوئے کہا کہ امریکی کمپنیاں اب متبادل مارکیٹس پر غور کر رہی ہیں اور بھارت کی پالیسیوں نے سرمایہ کاری کے لیے اس کی کشش کو شدید نقصان پہنچایا ہے۔

مزید پڑھیں: پاک بھارت کشیدگی ختم کرانے سے متعلق صدر ڈونلڈ ٹرمپ کا بڑا بیان سامنے آ گیا

امریکی صدر نے واضح کیا کہ بھارت کی جانب سے مسلسل خطے میں کشیدگی کو ہوا دینا اور ہمسایہ ممالک کے ساتھ محاذ آرائی کی فضا پیدا کرنا عالمی سرمایہ کاروں کے لیے باعث تشویش ہے۔

امریکی صدر ڈونلڈ ٹرمپ کا مزید کہنا تھا کہ جنگی فضا میں معیشت پنپ نہیں سکتی، اور اگر مودی حکومت نے رویہ نہ بدلا تو عالمی سرمایہ کاری کا رخ بھارت سے ہٹ سکتا ہے۔

ماہرین کے مطابق اگر امریکا جیسی بڑی طاقتیں بھارت سے معاشی فاصلے بڑھاتی ہیں تو اس کے سنگین اثرات مرتب ہوں گے۔ ایپل جیسی ٹیکنالوجی جائنٹس کی جانب سے سرمایہ کاری محدود کرنے یا روکنے کا فیصلہ بھارتی مارکیٹ کے لیے زلزلہ ثابت ہو سکتا ہے۔