غزہ پر اسرائیلی محاصرہ ختم کرانے اور جاری مظالم کی طرف عالمی توجہ مبذول کروانے کے لیے دنیا بھر سے تعلق رکھنے والے انسانی حقوق کے کارکنوں اور عام شہریوں نے “غزہ گلوبل مارچ” کے تحت رفح بارڈر کی جانب مارچ کا اعلان کیا ہے۔

عرب میڈیا کے مطابق، اس عالمی مارچ کا پہلا قافلہ، جس میں تقریباً 1000 افراد شامل ہیں، تیونس سے روانہ ہو چکا ہے اور گزشتہ روز لیبیا پہنچا۔ قافلے میں شمالی افریقہ کی پانچ ریاستوں تیونس، الجزائر، مراکش، موریطانیہ اور لیبیا سے تعلق رکھنے والے افراد شریک ہیں۔

منتظمین کے مطابق یہ مارچ 12 جون کو مصر کے دارالحکومت قاہرہ میں عالمی شرکاء کے اجتماع کے بعد رفح بارڈر کی جانب روانہ ہوگا، جہاں دنیا کے 50 سے زائد ممالک سے ہزاروں افراد شرکت کریں گے۔

مارچ کا مقصد غزہ کا محاصرہ ختم کرانے کے لیے عالمی دباؤ بڑھانا اور فلسطینی عوام کے ساتھ اظہار یکجہتی کرنا ہے۔

غزہ میں اکتوبر 2023 سے جاری اسرائیلی جارحیت کے نتیجے میں اب تک 54 ہزار سے زائد فلسطینی شہید جبکہ 1 لاکھ 26 ہزار سے زائد زخمی ہو چکے ہیں۔

اسرائیلی حملوں کے ساتھ ساتھ مسلسل محاصرے نے انسانی المیہ کو مزید سنگین بنا دیا ہے، جس کے باعث بنیادی ضروریاتِ زندگی خوراک، ادویات اور پینے کے پانی  کی شدید قلت پیدا ہو چکی ہے۔

واضح رہے کہ اسرائیل کی جانب سے غزہ کے خلاف جاری محاصرہ اور حملے بین الاقوامی انسانی حقوق کی تنظیموں اور کئی ممالک کی جانب سے تنقید کا نشانہ بنتے رہے ہیں، تاہم عالمی سطح پر مؤثر عملی اقدامات اب تک دیکھنے میں نہیں آئے۔

غزہ گلوبل مارچ کو مبصرین ایک اہم علامتی قدم قرار دے رہے ہیں جو عالمی برادری کو فلسطین کے مسئلے پر بیدار کرنے کی کوشش ہے۔