صوبہ پنجاب کے مختلف علاقوں میں 2 جون سے 5 جون تک آندھی، گرد آلود ہوائیں اور گرج چمک کے ساتھ بارشوں کا امکان ہے۔

پنجاب ڈیزاسٹر مینجمنٹ اتھارٹی (PDMA) نے موسمیاتی ایمرجنسی الرٹ جاری کر دیا ہے، شہریوں کو احتیاطی تدابیر اختیار کرنے کی سختی سے ہدایت کی گئی ہے۔

پی ڈی ایم اے کے مطابق راولپنڈی، مری، گلیات، اٹک، چکوال، منڈی بہاؤالدین، گجرات، جہلم اور گوجرانوالہ میں تیز آندھی اور بارش متوقع ہے۔

2 سے 4 جون کے دوران لاہور، قصور، سیالکوٹ، نارووال، اوکاڑہ، فیصل آباد، ٹوبہ ٹیک سنگھ، جھنگ، خوشاب، سرگودھا اور میانوالی میں بھی موسلا دھار بارشیں ہو سکتی ہیں۔

جنوبی پنجاب بھی اس سسٹم کی لپیٹ میں آ سکتا ہے، جہاں ملتان، ڈیرہ غازی خان، بہاولپور اور بہاولنگر میں بارش کی پیشگوئی کی گئی ہے۔

مزید پڑھیں:  پنجاب بھر میں پی ڈی ایم اے کا اہم ایمرجنسی الرٹ جاری، مگر کیوں؟ جانیے

ڈی جی پی ڈی ایم اے عرفان علی کاٹھیا نے کہا ہے کہ ممکنہ بارشوں کے باعث گرمی کی شدید لہر اور ہیٹ ویو میں کمی آئے گی۔ ان کا کہنا تھا کہ عیدالاضحیٰ کے دوران موسم نسبتاً خوشگوار رہنے کی توقع ہے۔

وزیراعلیٰ پنجاب کی ہدایت پر تمام ضلعی انتظامیہ، محکمہ صحت، آبپاشی، تعمیرات، لوکل گورنمنٹ اور لائیو اسٹاک کو الرٹ کر دیا گیا ہے۔

پی ڈی ایم اے نے شہریوں کو ہدایت دی ہے کہ خراب موسم کی صورت میں محفوظ مقامات پر رہیں، غیر ضروری سفر سے گریز کریں اور آسمانی بجلی یا طوفانی ہواؤں کے دوران کھلے آسمان تلے ہرگز نہ نکلیں۔

ایمرجنسی کی صورت میں فوری طور پر پی ڈی ایم اے ہیلپ لائن 1129 پر رابطہ کرنے کی اپیل کی گئی ہے۔