ایران کے جنوب مشرقی شہر زاہدان میں واقع ایک عدالت پر دہشتگردوں کے مہلک حملے کے نتیجے میں 5 شہری جاں بحق اور 13 افراد زخمی ہو گئے۔

واقعے کی تصدیق غیر ملکی میڈیا اور ایرانی حکام نے کی ہے۔

رپورٹس کے مطابق، مسلح دہشتگردوں نے جمعے کے روز عدالت پر دھاوا بولا، جس کے نتیجے میں وہاں موجود شہریوں کو نشانہ بنایا گیا۔

حملے کے فوراً بعد ایرانی سیکیورٹی فورسز نے بھرپور جوابی کارروائی کرتے ہوئے علاقے کو گھیرے میں لے لیا۔

ایرانی فورسز نے جوابی کارروائی میں تین حملہ آوروں کو ہلاک کر دیا، جبکہ دیگر دہشتگردوں کی تلاش کے لیے سرچ آپریشن جاری ہے۔

ابتدائی اطلاعات کے مطابق حملہ آور بھاری اسلحہ سے لیس تھے۔

زخمیوں میں بعض کی حالت نازک بتائی جا رہی ہے جنہیں قریبی اسپتالوں میں منتقل کر کے طبی امداد فراہم کی جا رہی ہے۔ حکام نے خدشہ ظاہر کیا ہے کہ ہلاکتوں میں اضافہ ہو سکتا ہے۔

زاہدان ایران کے صوبہ سیستان و بلوچستان کا دارالحکومت ہے، جہاں ماضی میں بھی شدت پسند عناصر کی جانب سے پرتشدد واقعات رپورٹ ہوتے رہے ہیں۔

ایرانی حکام نے واقعے کی مذمت کرتے ہوئے کہا ہے کہ ملک کی سلامتی کے خلاف ایسی کارروائیاں برداشت نہیں کی جائیں گی۔

مزید پڑھیں: مذاکرات کے لیے تیار، یورینیم افزودگی نہیں روکیں گے، ایرانی وزیرخارجہ

اس کے علاوہ ایرانی شہر سردشت میں بھی سیکیورٹی اہلکاروں پر حملے میں ایک اہلکار جاں بحق ہوا ہے۔

ایران میڈیا کے مطابق ایران کے مغربی آذربائیجان صوبے کے شہر سردشت کے قریب واقع گاؤں اغلان میں پاسدارانِ انقلاب (آئی آر جی سی) کے اڈے پر دہشت گرد حملے میں ایک اہلکار شہید اور دوسرا زخمی ہو گیا۔

پاسدارانِ انقلاب کی مغربی آذربائیجان شہدا بیس کے شعبہ تعلقات عامہ کے سربراہ کرنل شاکر نے اعلان کیا کہ چند گھنٹے قبل دہشت گرد گروہ کے ارکان نے سردشت کے قریب اغلان گاؤں میں واقع اڈے پر اندھا دھند فائرنگ کی، جس کے نتیجے میں ایک اہلکار شہید اور دوسرا زخمی ہو گیا۔

مزید پڑھیں: پاکستان اور ایران کے بعد امارات سے بھی افغان پناہ گزینوں کی واپسی شروع

انہوں نے مزید تفصیلات فراہم کیے بغیر کہا کہ یہ حملہ خطے میں موجود پاسداران انقلاب کے فوجی اڈے کو نشانہ بنانے کے لیے کیا گیا۔

واقعے کی تحقیقات جاری ہیں اور مقامی حکام کی جانب سے تاحال کوئی اضافی سرکاری بیان جاری نہیں کیا گیا۔