انٹرنیشنل کرکٹ کونسل (آئی سی سی) نے نئی ٹی20 پلیئرز رینکنگ جاری کر دی ہے، جس میں پاکستان کے نئے کھلاڑیوں نے بہترین کارکردگی کا مظاہرہ کیا ہے۔

آئی سی سی کی جارہ کردہ رینکنگ کے مطابق پاکستان کا کوئی بھی کھلاڑی ٹاپ 10 بیٹنگ یا باؤلنگ کیٹیگریز میں شامل نہیں ہو سکا۔ تاہم نوجوان پاکستانی کھلاڑیوں نے رینکنگ میں شاندار ترقی کر کے نمایاں چھلانگیں لگائی ہیں۔

پاکستان کے نوجوان بلے باز حسن نواز نے 24 درجے بہتری کے ساتھ 30ویں پوزیشن حاصل کر لی ہے جبکہ صائم ایوب 25 درجے ترقی پا کر 37ویں نمبر پر پہنچ گئے ہیں۔ صاحبزادہ فرحان نے بھی زبردست کارکردگی دکھاتے ہوئے 34 درجے بہتری کے ساتھ 63ویں پوزیشن پر جگہ بنائی۔

مزید پڑھیں: ٹرانس جینڈر کرکٹر کا بھارتی کرکٹ بورڈ اور آئی سی سی سے بڑا مطالبہ

باؤلرز کی فہرست میں صفیان مقیم نے 69 درجے کی بڑی چھلانگ لگاتے ہوئے 34ویں نمبر پر قبضہ جما لیا ہے۔ ویسٹ انڈیز کے خلاف حالیہ سیریز کے “پلئیر آف دی سیریز” محمد نواز نے بھی 51 درجے بہتری حاصل کر کے 56ویں پوزیشن پر جگہ بنائی۔

دوسری جانب سینئر کھلاڑیوں کے لیے یہ رینکنگ مایوس کن رہی۔ بابر اعظم 3 درجے تنزلی کے بعد 17ویں نمبر پر پہنچ گئے ہیں جبکہ محمد رضوان بھی 3 درجے تنزلی کے ساتھ 19ویں پوزیشن پر چلے گئے ہیں۔

بیٹنگ رینکنگ میں بھارت کے ابھیشیک شرما نے پہلی پوزیشن حاصل کر لی ہے جبکہ باؤلنگ کی رینکنگ میں نیوزی لینڈ کے جیکب ڈفی سرفہرست ہیں۔