دبئی: انٹرنیشنل کرکٹ کونسل (آئی سی سی) نے تازہ ترین ٹی ٹوئنٹی رینکنگ جاری کردی ہے، جس میں بھارت کے نوجوان بلے باز ابھیشیک شرما نے نیا عالمی ریکارڈ قائم کردیا ہے۔

ایشیا کپ کے پلیئر آف دی سیریز قرار پانے والے ابھیشیک شرما نے 931 پوائنٹس کے ساتھ بیٹنگ رینکنگ میں پہلا نمبر حاصل کرلیا ہے۔ اس طرح انہوں نے انگلینڈ کے ڈیوڈ ملان کا 2020 میں 919 پوائنٹس کا بنایا گیا ریکارڈ توڑ دیا۔

نئی رینکنگ کے مطابق انگلینڈ کے فل سالٹ دوسرے نمبر پر موجود ہیں جبکہ بھارت کے تلک ورما تیسرے نمبر پر برقرار ہیں۔ سری لنکا کے پتھوم نسانکا پہلی بار ٹاپ فائیو میں شامل ہوگئے ہیں۔

پاکستان کے اوپنر صاحبزادہ فرحان نے شاندار جست لگاتے ہوئے اپنے کیریئر کی بہترین 13ویں پوزیشن حاصل کرلی ہے۔ اسی طرح بھارت کے سنجو سیمسن 31ویں اور بنگلہ دیش کے سیف حسن 36ویں نمبر پر پہنچ گئے ہیں۔

بولنگ رینکنگ میں بھارت کے کلدیپ یادو، پاکستان کے شاہین شاہ آفریدی اور محمد نواز نے ترقی حاصل کی ہے، جبکہ نیپال کے دیپندرا ایری 72ویں نمبر پر ہیں اور آل راؤنڈرز کی رینکنگ میں چوتھی پوزیشن برقرار رکھے ہوئے ہیں۔

آل راؤنڈرز کی فہرست میں پاکستان کے صائم ایوب نے پہلی بار نمبر ون پوزیشن حاصل کی ہے۔ صائم ایوب نے زمبابوے کے سکندر رضا، افغانستان کے محمد نبی اور بھارت کے ہاردک پانڈیا کو پیچھے چھوڑتے ہوئے تاریخ رقم کردی۔