پرتگال کے لیجنڈری فٹبالر کرسٹیانو رونالڈو نے اپنی شاندار فٹبال کریئر کے ساتھ ایک ایسا سنگِ میل عبور کر لیا ہے جو آج تک کوئی اور فٹبالر نہ کر سکا وہ دنیا کے پہلے ارب پتی فٹبالر بن چکے ہیں

امریکی مالیاتی جریدے بلومبرگ کی نئی رپورٹ کے مطابق رونالڈو کی کل دولت کا اندازہ 1.4 ارب ڈالر لگایا گیا ہے، جس کے بعد وہ باضابطہ طور پر فٹبال کی دنیا کے پہلے بلینیئر قرار پا گئے ہیں۔

رونالڈو کی دولت میں سب سے بڑا دھماکہ 2023 میں سعودی کلب النصر کے ساتھ کیے گئے مہنگے ترین معاہدے سے ہوا، جس کی مجموعی مالیت تقریباً 400 ملین ڈالر بتائی گئی ہے۔

یہی نہیں رونالڈو نے 2002 سے 2023 کے درمیان صرف تنخواہوں کی مد میں 550 ملین ڈالر سے زائد کمائے۔

مشہور برانڈ Nike کے ساتھ ایک دہائی پر محیط معاہدے سے انہیں سالانہ 18 ملین ڈالر کی کمائی ہوئی، جبکہ اشتہارات اور اسپانسرشپ سے حاصل ہونے والی آمدنی کا مجموعی تخمینہ 175 ملین ڈالر سے تجاوز کر گیا ہے۔

رونالڈو اب ان عالمی اسپورٹس آئیکونز کی صف میں کھڑے ہیں جنہوں نے کھیل کے میدان سے باہر بھی دولت کی دنیا میں بڑا نام کمایا  جن میں مائیکل جارڈن، ٹائیگر ووڈز، راجر فیڈرر، لیبرون جیمز اور میجک جانسن جیسے لیجنڈز شامل ہیں۔

فٹبال کے بادشاہ نے نہ صرف میدان میں ریکارڈ توڑے، بلکہ بینک بیلنس میں بھی دنیا کو پیچھے چھوڑ دیا۔