پی آئی اے کےانجینئرزنے بڑا کام کردکھایا،گراونڈ کیےگئےجہاز کو اڑان کے قابل بنالیا۔

ترجمان کا کہنا ہے کہ پی آئی اے کا ایک اور ایئر بس اے320 طیارہ بی ایل وی ایک سال سےزائد عرصہ گراونڈرہنےکےبعداڑان کےقابل ہوگیا۔

 مذکورہ طیارہ کسی دوسرےطیارے سےپرزہ جات نکالےبغیرمکمل طورپرمقامی وسائل سے قابل استعمال حالت میں لایا گیاہے،طیارہ گزشتہ سال مئی سے ناکارہ حالت میں بے توجہی کا شکار تھا۔

قومی ائیرلائن کےسی ای اوائیرمارشل ارشدملک نےگزشتہ سال نومبر میں چارج سنبھالنے کے بعد تمام گراونڈ طیاروں کو قابل اڑان بنانے کے احکامات جاری کئے تھے۔

 واضح رہے کہ اس سےقبل ایک اور بوئنگ 777 طیارہ بھی ڈیڑھ سال سےزائدگراونڈرہنےکےبعدگزشتہ ماہ درست حالت میں تیارکردیاگیا۔

پی آئی اےنےاس سلسلے میں حکومت سے مالی مدد کی درخواست بھی کی تھی جس پر حکومت کی جانب سے کوئی خاطر خواہ عملدرآمد نہیں کیا گیا اور مشکل حالات کے باوجود قومی ائیرلائن نےاپنے وسائل کا موثر استعمال کیا ۔

دو طیاروں کی بروقت بحالی کے بعد پی آئی اے کے حج آپریشن میں مزید آسانی ہو گئی ہے۔ حج آپریشن بغیر کسی کرائے کے طیارے کے مکمل طور پر پی آئی اے کے اپنے طیاروں سے کیا جا رہا ہے۔

ائیرمارشل ارشد ملک نےطیارے کی بحالی ممکن بنانےپرپی آئی اے کےکارکنوں کو مبارکباد دیتے ہوئےاور بالخصوص انجینئرنگ ، فلائیٹ آپریشن، فنانس اورسپلائی چین منیجمنٹ کے شعبوں کی کارکردگی کو سراہتے ہوئے انکے لئے تعریفی اسناد دینے کا اعلان کیا ہے .

 ائیربس بی ایل وی کی بحالی کےبعد اب قومی ائیرلائن کا کوئی طیارہ گراونڈ نہیں ہے۔