رحیم یار خان ولہار اسٹیشن کے قریب مسافر ٹرین کھڑی مال گاڑٰی سے ٹکرا گئی۔ جس کے نتیجے میں گیارہ افراد جاں بحق اور 70 سے زائد افراد زخمی ہوگئے۔

لاہور سے کوئٹہ جانے والی اکبر ایکسپریس ولہار اسٹیشن کے قریب  کھڑی مال گاڑی سے ٹکرا گئی۔

حادثے کے نتیجے میں مسافر ٹرین کا انجن مکمل طور پر تباہ ہوگیا، ٹرین کی 3 سے 4 بوگیاں بھی شدید متاثر ہیں۔

زخمیوں  اور لاشوں کو جناح اور شیخ زائد اسپتال منتقل کیا گیا۔

وزیر ریلوے شیخ رشید کی جانب سے واقعے پر شدید افسوس کا اظہار کیا گیا ہے۔

بول نیوز سے بات کرتے ہوئےشیخ رشید نے کہا کہ موقع پر امدادی ٹیمیں اپنی کارروائیوں میں مصروف ہیں۔

ادھرڈی پی او عمر سلامت نے بتایا کہ تمام اسپتالوں میں ایمرجنسی نافذ کردی گئی ہے جب کہ ہیلپ لائن اور کنٹرول روم بھی قائم کردیا گیا ہے۔

انہوں نے بتایا کہ کٹرز اور ہیوی مشینری موقع پر پہنچ گئی ہیں اور ریسکیو آپریشن بھی جلد مکمل ہوجائے گا۔

ترجمان ریلوے نے اپنے بیان میں کہا کہ پاکستان ریلوے نے جائے حادثہ پر زخمیوں کے لیے پیرا میڈیکل کیمپ قائم کردیا ہے۔ معمولی زخمی مسافروں کو فوری طبی امداد موقع پر دی جا رہی ہے۔

انتظامیہ نے ضلعی انتظامیہ کے ساتھ فوری ریلیف آپریشن بھئ شروع کردیا۔

پاکستان ریلوے کی اپ اور ڈاون کی ٹریفک معمول کے مطابق چل رہی ہے۔ وفاقی وزیر ریلوے شیخ رشید احمد کا معاملے نے فوری تحقیقاتی رپورٹ طلب کرلی۔