وزیر اعظم عمران خان نے کہا کہ مجھے اپنے عوام پر فخر ہے جنہوں نے کشمیریوں کے ساتھ اظہار یک جہتی کیا اور کشمیریوں کو بتایا کہ پاکستانی انکے ساتھ کھڑے ہیں۔

سامجی رابطے کی ویب سائٹ ٹوئٹر پر اپنے ایک پیغام میں وزیر اعظم عمران خان نے کہا کہ مودی کے ظلم وستم کے شکار کشمیریوں کو پاکستانی کبھی تنہا نہیں چھوڑیں گے۔

وزیر اعظم نے کہا کہ مقبوضہ کشمیر میں مودی کا ایجنڈا مذہبی منافقت پر مبنی ہے جبکہ مودی مقبوضہ کشمیر میں مسلمانوں کی نسل کشی کررہا ہے۔

عمران خان نے ٹوئٹ میں مزید کہا کہ بھارت پر ہندواتا کا قبضہ خطے اور دنیا کے امن کےلئے مسلسل خطرہ ہے لیکن پاکستانی قوم نے دنیا کو بھارت میں نازی سٹائل حکومت ،آر ایس ایس اور بی جے پی کی ہندواتا زہنیت اور نظریہ اور خطرے سے متعلق آگاہ کیا ہے۔

واضح رہے کہ اس سے قبل وزیر اعظم عمران خان کی قوم سے اپیل پر آج ملک بھر کے عوام مظلوم کشمیری بھائیوں اور بہنوں سے اظہار یکجہتی کیلئے اور دنیا کو واضح پیغام پہنچانے کیلئے گھروں سےنکل گئے تھے جبکہ ملک بھر کےعوام نے کشمیریوں سے عملی طور پریکجہتی کا اظہارکیا اور اس سلسلے میں دوپہر 12 سے ساڑھے 12 بجے تک اہم شاہراہوں پر بھی ٹریفک کو روک دیا گیا تھا۔

دوسری جانب وزیر اعظم عمران خان نے کہا ہے کہ دنیا کشمیر کو نظر انداز نہیں‌ کر سکتی، آخری دم تک کشمیریوں کے ساتھ کھڑ ے رہیں گے وزیر اعظم عمران خان نے امریکی جریدے میں لکھے گئے کالم میں کہا کہ جب سے وزیراعظم بنا ہوں جنوبی ایشیا میں امن ترجیح ہے۔