وطن کےدفاع میں جان کا نذرانہ پیش کرنے والے قوم کےسپوت میجر عزیز بھٹی شہید کا 96واں یوم پیدائش آج منایاجارہاہے ۔
میجرعزیز بھٹی نے1965کی پاک بھارت جنگ میں بی آر بی نہرکےکنارے دشمن کا جواں مردی سے مقابلہ کرتےہوئےجام شہادت نوش کیا۔
بےمثال جرات و بہادری پر انھیں سب سے بڑےاعزاز نشان حیدر سے نواز گیا ۔
میجر عزیز بھٹی شہید6 اگست 1923ء کو ہانگ کانگ میں پیدا ہوئے تھے۔
قیام پاکستان کے بعد 21 جنوری 1948ء کو پاکستان ملٹری اکیڈمی میں شامل ہوئے۔

1950ء میں پاکستان ملٹری اکیڈمی کے پہلے ریگولر کورس کی پاسنگ آؤٹ پریڈ میں انہیں شہید ملت خان لیاقت علی خان نے بہترین کیڈٹ کے اعزاز کے علاوہ شمشیر اعزازی اور نارمن گولڈ میڈل کے اعزاز سے نوازا۔
پھر انہوں نے پنجاب رجمنٹ میں سیکنڈ لیفٹیننٹ کی حیثیت سے شمولیت اختیار کی اور 1956ء میں ترقی کرتے کرتے میجر بن گئے۔
6 ستمبر 1965ء کو جب بھارت نے پاکستان پر حملہ کیا تو میجر عزیز بھٹی لاہور سیکٹر میں برکی کے علاقے میں ایک کمپنی کی کمان کر رہے تھے ۔
اس کمپنی کے دو پلاٹون بی آر بی نہر کے دوسرے کنارے پر متعین تھے۔
میجر عزیز بھٹی نے نہر کے اگلے کنارے پر متعین پلاٹون کے ساتھ آگے بڑھنے کا فیصلہ کیا۔
ان حالات میں جبکہ دشمن تابڑ توڑ حملے کر رہا تھا اور اسے توپ خانے اور ٹینکوں کی پوری امداد حاصل تھی۔
میجر عزیز بھٹی اور ان کے جوانوں نے آہنی عزم کے ساتھ لڑائی جاری رکھی اور اپنی پوزیشن پر ڈٹے رہے۔
9 اور 10 ستمبر کی درمیانی رات کو دشمن نے اس سارے سیکٹر میں بھرپور حملے کے لیے اپنی ایک پوری بٹالین جھونک دی۔
تو انہوں نے ایک انتہائی سنگین حملے کی قیادت کرتے ہوئے دشمن کو اس علاقے سے نکال باہر کیا اور پھر اس وقت تک دشمن کی زد میں کھڑے رہے جب تک ان کے تمام جوان اور گاڑیاں نہر کے پار نہ پہنچ گئیں۔
اسی دوران دشمن کے ایک ٹینک کا گولہ ان پر آن لگا جس سے وہ شہید ہو گئے ۔
حکومت پاکستان نے ان کی بہادری اور جوانمردی کا اعتراف کرتے ہوئے انہیں فوج کے سب سے بڑے اعزاز نشان حیدر سے نوازا۔