وزیر خارجہ شاہ محمود قریشی  کا کہناہے کہ مقبوضہ کشمیر کی صورتحال پر جو ہم مسلسل کہتے آرہے ہیں آج انسانی حقوق کے حوالے سے کام کرنے والی عالمی تنظیم ’جینو سائیڈ واچ‘ نے بھی اس کی تصدیق کردی۔

وزیر خارجہ شاہ محمود قریشی نے اپنے ردعمل میں کہا ہے کہ جو ہم مسلسل کہتے آرہے ہیں آج عالمی تنظیم نے بھی اس کی تصدیق کردی، مقبوضہ کشمیر میں قتل عام ہو رہا ہے، یہ تنظیم تمام صورتحال اور علامات دیکھ کر الرٹ جاری کرتی ہے۔

وزیر خارجہ نے کہا کہ مقبوضہ  کشمیر پر دنیا کو خاموشی توڑنا ہوگی ۔مقبوضہ وادی میں نوجوان، بچوں، بچیوں کو اٹھایا جارہاہے۔ والدین کو خوف ہے بچے اسکول جائیں تو واپس لوٹیں گے یا نہیں۔ ہمار ے پاس جو ممکنہ راستے ہیں اختیارکررہے ہیں۔ مقبوضہ وادی کی صورتحال بہت سنگین ہے۔ مقبوضہ کشمیر میں بات اب مشاہدے سے آگے نکل چکی ہے۔

اس سے قبل جینو سائیڈ واچ نے اپنی جاری کردہ رپورٹ میں اعتراف کیا ہے کہ بھارت کی قابض افواج اب تک 70 ہزار کشمیریوں کو شہید کرچکی ہے۔جبکہ 1989 سے لے کر 2006 تک کے درمیانی عرصے میں 50 ہزار کشمیریوں کو شہید کیا گیا ہے۔

جینو سائیڈ واچ کے مطابق بھارت کی قابض انتظامیہ کی جانب سے مسلط فوجی آمریت جابرانہ اقدامات کی ایک شکل ہےجبکہ بھارتی وزیراعظم نریندر مودی کی جماعت بھارتیہ جنتا پارٹی کا نظریہ ہندو توا اس کی واضح علامت ہے۔

مقبوضہ وادی کشمیر کی  کشیدہ صورتحال دیکھ کر جینو سائیڈ واچ نے الرٹ جاری کرتے ہوئے اقوام متحدہ اور اس کے رکن ممالک سے مطالبہ کیا ہے کہ وہ بھارت کو کشمیریوں کی نسل کشی سے روکیں۔