الیکشن کمیشن آف پاکستان نے مریم نواز کے پارٹی عہدہ کےخلاف کیس کا فیصلہ 3 ستمبر تک موخر کر دیا ہے۔

چیف الیکشن کمشنر جسٹس ریٹائرڈ سردار رضا نے ریمارکس دیئے کہ کیس سے متعلق مزید تفصیلات درکار ہیں، سپریم کورٹ کا تحریری فیصلہ دیکھنا ہے، سپریم کورٹ کے فیصلے اور آرٹیکل 62، 63 کے اطلاق پر مزید معاونت درکار ہے، الیکشن کمیشن نے وکلاء کو مزید معاونت فراہم کرنے کی ہدایت کی ہے۔

واضح رہے کہ چیف الیکشن کمشنر کی سربراہی میں تین رکنی کمیشن نے آج فیصلہ سنانا تھا، مریم نواز کے پارٹی عہدہ کیخلاف پی ٹی آئی ارکان اسمبلی نے درخواست دائر کر رکھی ہے۔

تحریک انصاف نے مریم نوازاورشہبازشریف کوفریق بنایاتھا،الیکشن کمیشن نے گزشتہ سماعت پر فیصلہ محفوظ کیا تھا،چیف الیکشن کمشنر سردار رضا حیات کی سربراہی میں تین رکنی بینچ فیصلہ سنائے گا۔

گذشتہ سماعت پر لیگی نائب صدر کے وکیل بیرسٹر ظفراللہ نے اپنے دلائل دیتے ہوئے عدالت کو بتایا کہ سپریم کورٹ کے فیصلے کا مریم نواز پر اطلاق نہیں ہوتا، جیل میں موجود شخص بھی پارٹی عہدہ رکھ سکتا ہے۔

اس کیس میں مریم نواز کی جانب سے ان کے وکیل نے تحریری جواب جمع کرارکھا ہے جواب میں موقف اختیار کیا گیا کہ آئین اور الیکشن ایکٹ میں ایسی کوئی ممانعت یاکوئی شرط نہیں ہے کہ سزایافتہ شخص پارٹی کا عہدیدار نہیں ہوسکتا۔