ایل این جی ٹرمینل کیس میں گرفتار سابق مشیر خزانہ مفتاح اسماعیل اور سابق ایم ڈی پی ایس او عمران الحق کو  11روزہ جسمانی ریمانڈ پر نیب کے حوالے کر دیا گیا ہے۔

تفصیلات کے مطا بق دونوں ملزمان کو 19 اگست کو دوبارہ عدالت کے سامنے پیش کرنے کا حکم بھی جا ری کر دیا گیا ہے۔

نیب نے مفتاح اسماعیل سے تفتیش کے لئے جسمانی ریمانڈ کی استدعا کی تھی۔

جج نے نیب ٹیم سے استفسارکیا کہ پہلے یہ بتائیں کہ مفتاح اسماعیل کو کیوں گرفتار کیا ہے، کاز آف اریسٹ کہاں ہے۔

ڈیوٹی جج احتساب عدالت طاہر محمود تفتیشی افسر نے وارنٹ گرفتاری کی نقل عدالت میں پیش کردی۔

اس کے سا تھ ساتھ دوران سماعت نیب حکام نے مفتاح اسماعیل کی میڈیکل رپورٹ بھی عدالت میں پیش کی۔ 

 نیب نے ایل این جی کیس میں ضمانت مسترد ہونے پر سابق مشیر خزانہ اور لیگی رہنما مفتاح اسماعیل کو گرفتار کیا تھا، اسلام آباد ہائی کورٹ کے چیف جسٹس اطہرمن اللہ اورجسٹس محسن اخترکیانی نے سابق مشیر خزانہ مفتاح اسماعیل کی ضمانت قبل ازگرفتاری کی درخواست پر سماعت کی۔

واضح رہے کہ  مفتاح اسماعیل نے ایل این جی کیس میں ضمانت میں توسیع کی درخواست دائر کر رکھی تھی، بعد ازاں عدالت نے مفتاح اسماعیل اورعمران الحق کی ضمانت قبل ازگرفتاری کی درخواستیں مسترد کردیں جس پر نیب نے دونوں کو کمرہ عدالت سے نکلتے ہی گرفتار کرلیا۔