وزیراعظم عمران خان کاکہناہے کہ آج پورا پاکستان کشمیریوں سےیکجہتی کیلئے ایک ساتھ کھڑاہے،کشمیریوں کوبتانا چاہتے ہیں ہم سب انکے ساتھ کھڑے ہیں۔

وزیراعظم عمران خان نےکشمیریوں سےاظہاریکجہتی کی تقریب سے خطاب کرتے ہوئے کہا کہ کشمیری بہت مشکل وقت میں کھڑے ہیں،پاکستانی قوم آخری دم تک کشمیریوں کےساتھ کھڑی رہے گی۔

وزیراعظم کاکہناتھاکہ بھارتی سرکار نےکشمیریوں پر ظلم وستم کی ساری حدیں پار کردیں،کشمیری تقریباً4 ہفتوں سے کرفیو کی وجہ سے قید ہیں۔

خطاب کے دوران وزیراعظم نے کہا کہ آرایس ایس کانظریہ مسلمانوں کے خلاف نفرت ہے، مسلمانوں کےخلاف نفرت کے رویے نےبھارت پرقبضہ کرلیاہے۔ آر ایس ایس جنونی اور انتہاپسندگروپ ہے،آر ایس ایس سے تعلق رکھنے والے شخص نے ہی گاندھی کوبھی قتل کیاتھا۔

وزیراعظم عمران خان کاتقریب سےخطاب میں کہناتھا کہ افسوس ہےکہ دنیامسلمانوں پر مظالم ہونے پربھی خاموش رہتی ہے،اگرکشمیری مسلمان نہ ہوتےتوآج پوری دنیامیں شور ہوتا۔نازیوں کافلسفہ آج کشمیر میں نظر آرہاہے۔ نازی پارٹی سمجھتی تھی جرمنی میں کوئی اور نسل نہیں۔5سے6کروڑ انسان دوسری جنگ عظیم میں مارے گئےتھے۔

عالمی اداروں کی جانب سے کشمیر کےمعاملے کونظرانداز کرنےپروزیراعظم نےاپنے خطاب میں کہا کہ جن عالمی اداروں کوانصاف دیناہے، وہ خاموش ہیں،میں ہر فورم پرکشمیریوں کی جنگ لڑوں گا۔ نیویارک ٹائمزمیں کشمیر کےحوالےسے آج میرا مضمون شائع ہواہے۔

وزیراعظم نے کہاکہ نیوکلئیرطاقتوں کی جنگ سے نقصان ساری دنیاکوہوگا۔خطاب کے دوران وزیراعظم نےدوٹوک الفاظ میں بھارت کوتنبیہہ کرتے ہوئے کہا کہ بھارت کسی خوش فہمی میں نہ رہے،بھارت نے اگرجارحیت  کی تواینٹ کاجواب پتھر سےدیں گے، مودی نے آزاد کشمیرمیں کچھ کیاتو ہماری فوج پوری طرح سےان کا مقابلہ کرنےکیلئےتیارکھڑی ہے۔

واضح رہے کہ کشمیریوں سےاظہار یکجہتی کیلئے ملک بھر میں کشمیرآورمنایاگیا اورکشمیریوں سے اظہار یکجہتی کے طور پر12 بجتے ہی سائرن بجائے گئے۔ اس موقع پرملک بھرمیں ریلیاں نکالی گئیں اور کشمیرکی آزادی کے حق میں نعرے لگائے گئے۔ ریلیوں میں کشمیر اورپاکستانی پرچم بھی لہرائے گئے۔

اس موقع پروزیراعظم عمران خان اور کابینہ ارکان وزیراعظم ہاوس کے باہرجمع ہوئے۔