میرپور آزاد کشمیر ، جہلم اور ملحقہ علاقوں میں 4 اعشاریہ 4 شدت کے آفٹر شاکس محسوس کیے گئےجس سے مزید 46 افراد زخمی ہوگئے ہیں۔

تفصیلات کے مطابق 24 ستمبر کو آنے والے شدید زلزلے کے بعد سے علاقے میں آفٹر شاکس کا سلسلہ جاری و ساری ہے اور آج صبح یہ آفٹر شاکس کئی مرتبہ آئے ہیں تاہم اس بار اس کی شدت پہلے سے زیادہ تھی، جس کے با عث علاقے کے لوگوں میں خوف و ہراس پھر سے پھیل گیا۔

زلزلہ پیما مرکز کے مطابق زلزلے کا مرکز جہلم کے قریب موجود فالٹ لائن ہی تھی جبکہ حالیہ آنے والے آفٹر شاک زلزلے کی شدت 4 اعشاریہ 4 اور اس کی زمین میں گہرائی 12 کلومیٹر تھی،شدید نوعیت کے اس آفٹر شاک زلزلے سے ایک بار پھر زمین کانپ اٹھی اور وہاں پر موجود لوگ کھلے مقامات پر جمع ہوکر کلمہ توحید کا ورد کر نے لگے ۔

حالیہ زلزلے کے جھٹکوں کے بعد میر پور آزاد کشمیر کے مضافاتی علاقوں میں مکانات گرنے کے واقعات بھی سامنے آئےہیں جبکہ زخمیوں میں زیادہ تر تعداد خواتین کی ہے، جنھیں ڈسٹرکٹ ہیڈ کوارٹر اسپتال منتقل کردیا گیا ہے۔

واضح رہے کہ دو روز قبل 24ستمبرکے دن آنے والے ہولناک زلزلے کے باعث زخمی ہونیوالے 2 مزید افراد دم توڑگئے ہیں جس سے جاں بحق افراد کی تعداد 39 اور زخمیوں کی تعداد 614 تک جا پہنچی ہے ۔

نیشنل ڈیزاسٹر منیجمنٹ اتھارٹی نے زلزلے سے متاثرہ علاقوں کی جانی و مالی نقصان کی تفصیلات جاری کر دی ہیں، جس کے مطابق زلزلے میں 39 افراد جاں بحق جب کہ 646  افراد زخمی ہوئے ہیں۔