احتساب عدالت نے شاہد خاقان عباسی کو جیل میں سہولیات فراہمی کی درخواست منظور کرلی ہے۔

تفصیلات کے مطابق احتساب عدالت نے شاہد خاقان عباسی کو جیل میں سہولیات فراہمی کی درخواست منظور کرلی ہے ، عدالت کا اس سلسلے میں کہنا ہے کہ جو سہولیات سا بق صدرآصف زرداری کو دی گئیں وہی شاہد خاقان عباسی کو بھی دی جائیں۔

احتساب عدالت کے جج محمد بشیر نے شاہد خاقان عباسی کی ہمشیرہ کی درخواست پر حکم سنایا، درخواست میں موقف اپنایا گیا تھا کہ شاہد خاقان کو گھر کا کھانا، اے سی، ٹی وی، ٹوسٹر اور فریج دیا جائے جبکہ اس کے ساتھ ساتھ  سابق وزیر اعظم نے مائیکروویو، کمپیوٹر، ٹیب، بیڈ، ٹیبل، مچھر دانی کا بھی مطالبہ کیا ۔

واضح رہے کہ ایل این جی کیس میں گرفتار سابق وزیراعظم شاہد خاقان عباسی نے راولپنڈی کی اڈیالہ جیل میں بہتر سہولیات حاصل کرنے کے لیے احتساب عدالت میں درخواست دائرکی تھی۔ 

شاہد خاقان عباسی کو ایل این جی کیس میں 26 ستمبر کو جوڈیشل ریمانڈ پر اڈیالہ جیل بھیج دیا گیا تھا، ان کے وکیل نے عدالت میں موقف اختیار کیا کہ شاہد خاقان عباسی کو 1999 میں ملیر جیل میں قید کے دوران بھی بہتر کلاس دی گئی تھی،اس کے علاوہ وکیل کا یہ بھی کہنا تھا کہ جیل انتظامیہ شاہد خاقان عباسی سے قریبی عزیزوں کو بھی ملاقات نہیں کرنے دے رہی۔

انہوں نے عدالت کومزید بتایا کہ سابق وزیراعظم کو کچھ صحت کے مسائل بھی لاحق ہیں اس لیے انہیں پرہیزی کھانے کے ساتھ ساتھ ایئر کنڈیشنر، ریفریجریٹر، ٹیلی ویژن، اخبارات، بستر، کتابیں، ٹوسٹر اور اوون کی سہولیات بھی فراہم کی جائے۔