پاکستان پیپلزپارٹی کے مرکزی رہنما سید خورشید شاہ نے کہا ہے کہ کشمیر میں بھارتی افواج کے مظالم سامنے آرہے ہیں۔

سکھر میں میڈیا سے گفتگو کے دوران  پاکستان پیپلزپارٹی کے مرکزی رہنما سید خورشید شاہ نے کہا کہ کشمیر میں بھارتی افواج کے مظالم سامنے آرہے ہیں، کشمیر کا بارہ سال کا بچہ بھی میدان میں ہے اور 80سالہ کشمیری بھی۔

انہوں نے کہا کہ کشمیری ستر سال سے اپنی آزادی کی جنگ لڑ رہے ہیں۔کشمیر آج دنیا کا سب سے بڑا قید خانہ ہے۔

انہوں نے حیرت ظاہر کی کہ کشمیر میں بھارتی درندگی کے باوجود بھی  یو اے ای نے مودی کو ایوارڈ دیا ہے۔

واضح رہے کہ مقبوضہ کشمیر میں آج مسلسل 29ویں روز بھی کرفیو برقرار ہے اور مواصلات کا نظام مکمل پر معطل ہے۔

آرٹیکل 370 اے ختم کرنے کے بعد مقبوضہ کشمیر قید خانے میں تبدیل ہوچکا ہے۔وادی بھر میں  موبائل فون، انٹرنیٹ سروس بند اور ٹی وی نشریات معطل ہیں۔

مقبوضہ وادی میں مکمل لاک ڈاؤن سے کشمیریوں کا بیرونی دنیا سے رابطہ کٹا ہوا ہے، کرفیو اور پابندیوں کے باوجود مقبوضہ وادی میں میں کشمیریوں کی مزاحمت میں کمی نہ آئی۔

کشمیرمیڈیا سروس کے مطابق مواصلاتی نظام کی معطلی، مسلسل کرفیو اور سخت پابندیوں کے باعث لوگوں کو بچوں کے لیے دودھ، زندگی بچانے والی ادویات اور دیگر اشیائے ضروریہ کی شدید قلت کا سامنا ہے۔

بھارتی اداروں کی جانب سے 35ہزار سے زائد سوشل میڈیا اکاؤنٹس کی چھان بین کی جارہی ہے۔

گذشتہ ماہ پانچ اگست کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل کو ختم کردیا تھا۔

عیدالاضحیٰ کے موقع پر بھی مقبوضہ وادی میں کرفیو نافذ رہا جس کے باعث مسلمان عید کی نماز اور سنت ابراہیمی علیہ اسلام ادا کرنے سے محروم رہے۔