وزیر اعظم عمران خان نے کہا ہے کہ سکھ برادری کے لیے ہم ہر قسم کی آسانی پیدا کریں گے، پاکستان میں موجود اقلیتی برادری برابر کے شہری ہیں۔

تفصیلات کے مطابق وزیر اعظم عمران خان نے گورنر ہاوس میں انٹرنیشنل سکھ کنونشن سے خطاب کرتے ہوئے کہا کہ میں دنیا بھر سے آئے ہوئے سکھوں کو خوش آمدید کہتا ہوں، کوشش کریں گے سکھوں کو ایئر پورٹ پر ویزے کی سہولت ملے، پاکستان آنے والے سکھوں کو ملٹی پل ویزے دیں گے۔

وزیر اعظم عمران خان نے کہا کہ بھارت میں بی جے پی حکومت صرف ہندو راج چاہ رہی ہے، وہاں کوئی گائے بھی لے کر جاتا ہے تو اسے قتل کر دیا جاتا ہے۔

وزیر اعظم عمران خان نے یہ بھی کہا کہ کشمیر میں کرفیو لگا کر بھارت نے 80 لاکھ لوگوں کو 29 روز سے بند کر رکھا ہے، مسلمان اگر کسی بھی مذہب سے نا انصافی کرے تو یہ دین کی خلاف ورزی ہوتی ہے

عمران خان کا کہنا تھا کہ ہندو مت سمیت کوئی بھی مذہب انسانوں سے ایسے رویے کی اجازت نہیں دیتا، بھارت میں جو ماحول بن رہا ہے مجھے اس پر خوف آتا ہے،

وزیر اعظم عمران خان کا خطاب میں یہ بھی کہنا تھا کہ  20 کروڑ مسلمان ڈر ڈر کر زندگی گزار رہے ہیں ، اقلیتیں خطرے میں ہیں، آج مسلمان نشانہ ہیں کل دوسروں کی باری ہے۔

عمران خان نے کہا کہ بھارت کو آر ایس ایس لے کر چل رہی ہے، خود بھارت کو بھی آر ایس ایس نظریے سے خطرہ ہے۔

وزیراعظم نے یہ بھی کہا کہ جنگ سے مسئلے حل نہیں کیے جا سکتے،مسئلہ کشمیر کو ہم ڈائیلاگ کے ذریعے حل کر سکتے تھے، افسوس ہے ہماری پیش کش پر بھارت کا رویہ غیر ذمہ دارانہ رہا،بی جے پی حکومت اس نظریے پر چل رہی ہے جس کی وجہ سے پاکستان بنا۔

وزیر اعظم عمران خان نے مزید کہا کہ پاکستان اور بھارت ایٹمی ملک ہیں ٹینشن بڑھی تو دنیا کو خطرہ ہو جائے گا، پاکستان کی طرف سے کبھی جنگ کی پہل نہیں ہوگی۔