سندھ حکومت کی کراچی میں ایک ماہ طویل خصوصی صفائی مہم آج سے شروع ہو گی ہے ۔ 

تفصیلات کے مطابق صفائی مہم کے لئے پانچ کروڑ روپے کے فنڈزاور مشینری فراہم کر دی گئی،وزیر اعلٰی سندھ مہم کی نگرانی کریں گے جبکہ وزراحصہ لیں گے، مہم کے دوران کراچی کے تمام اضلاع میں کچرا اٹھایا جائے گا۔

ترجمان کا صفائی مہم کے بارے میں کہنا ہے کہ اس مہم میں محکمہ بلدیات کے 6 ہزار ملازمین حصہ لیں گے، مہم کے لیے6 اضلاع کے ڈپٹی کمشنرز کو پانچ کروڑ روپے کے فنڈزاور مشینری فراہم کر دی گئی ہے ، مہم میں کچرا اٹھانے کے لیے600 ڈمپرز کی مدد لی جائے گی۔

صفائی مہم کیلئے سالڈویسٹ اور ڈی ایم سیزملازمین کی چھٹیاں منسوخ کر دی گئی ہیں، جس کا نوٹی فیکیشن بھی جاری کردیا گیا ہے۔

دوسری جا نب میئر کراچی وسیم اختر وزیراعلیٰ سندھ کا ساتھ دینے کیلئے پُرعزم ہے اور کےایم سی کو بھی ساتھ دینے کا مشورہ دیتے ہوئے کہا ساتھ دیں تاکہ اپنے شہرکو صاف کرسکیں۔

واضح رہے کہ گذشتہ روز وزیراعلیٰ سندھ کی زیرصدارت شہر کی صفائی سے متعلق اجلاس ہوا تھا ، جس میں مراد علی شاہ نے پوری صفائی کا کام دستاویزی طریقے سے کرنے کا حکم دیتے ہوئے ہدایت کی کچرے کے ہر ڈمپر کی تصویر بنائیں، پھر صفائی کا فوٹو اور ویڈیو بنائیں اور جیسے ہی صفائی مکمل ہو کچرا کنڈیاں بھی بنائی جائیں ۔

وزیراعلیٰ سندھ نے فیصلہ کیا تھا کہ ہر ضلع کی صفائی مانیٹرنگ 2 وزرا کے حوالے کی جائے گی اور کمشنر کو ہدایت کی کہ سڑک پر کچرا پھینکنے والوں کیخلاف کارروائی کی جائے، صفائی مہم کیلئے پولیس، رینجرز کو سیکیورٹی کیلئے درخواست کروں گا۔

وزیراعلیٰ سندھ نے 21 ستمبر سے کراچی میں خصوصی صفائی مہم شروع کرنے کا اعلان کیا تھا اور علی زیدی سے درخواست کی کہ اپنی صفائی مہم بند کردیں