افغانستان کے وزیر خارجہ صلاح الدین ربانی کی وزارت خارجہ میں وزیر خارجہ مخدوم شاہ محمود قریشی سے ملاقات ہوئی ہے۔

تفصیلات کے مطابق ملاقات میں وزیر خارجہ مخدوم شاہ محمود قریشی نے اپنے افغانی ہم منصب کو پاکستان تشریف آوری پر خوش آمدید کہا جبکہ دو طرفہ تعلقات ، افغان امن عمل اور خطے کی صورتحال پر تبادلہ خیال کیا گیا ہے۔

وزیر خارجہ شاہ محمود قریشی نے کہا کہ پاکستان اور افغانستان کے مابین دیرینہ مذہبی، سیاسی، ثقافتی تعلقات ہیں جبکہ خطے میں امن و استحکام کے لیے پر امن افغانستان ناگزیر ہے۔

وزیر خارجہ نے کہا کہ وزیر اعظم عمران خان خطے کے تمام ہمسایہ ممالک بشمول افغانستان کے ساتھ گہرے تعلقات استوار کرنے کے خواہاں ہیں جبکہ پاکستان شروع سے افغانستان کے مسئلے کے مذاکرات کے ذریعے سیاسی حل کا متقاضی رہا ہے۔

انکا مزید کہنا تھا کہ الحمدللہ سترہ سال کے بعد دنیا بھر نے مسئلہ افغانستان کے حوالے سے ہمارے نقطئہ نظر کو تسلیم کیا ہے اور پاکستان ، مشترکہ ذمہ داری کے تحت افغان امن عمل میں اپنا مصالحانہ کردار ادا کر رہا ہے اور کرتا رہے گا۔

انہوں نے ملاقات میں کہا کہ 27 جون 2019 کو افغان صدر اشرف غنی کے دورہ ء پاکستان سے دونوں ممالک کے مابین تعلقات کو فروغ ملا اور زیر اعظم عمران خان اور افغان صدر اشرف غنی کے مابین ملاقات میں طے کیا گیا کہ دونوں ممالک ماضی کو بھلا کر باہمی ترقی اور استحکام کے لیے مثبت انداز میں آگے بڑھیں گے۔