وزیرخارجہ شاہ محمود قریشی نےکہاہے کہ بھارتی فورسزمقبوضہ کشمیر میں نوجوانوں پر بہیمانہ تشدد کررہی ہے،بھارت مقبوضہ وادی میں مسلم اکثریت کو اقلیت میں تبدیل کرنا چاہتاہے۔

وزیرخارجہ نےانسانی حقوق کونسل سے خطاب کرتے ہوئے کہاکہ برطانوی میڈیا نے بھی مقبوضہ کشمیر میں بھارتی مظالم کو بےنقاب کیا۔ بی بی سی کی رپورٹ میں ایک کشمیری نےکہا تشدد نہ کریں، گولی مار دیں۔

وزیرخارجہ کاکہناتھا کہ مقبوضہ کشمیر میں جانیں بچانے والی ادویات اورکھانے پینے کی اشیا کی قلت ہےاور وہاں بنیادی انسانی حقوق کی خلاف ورزیاں ہورہی ہیں۔

بھارتی ہٹ دھرمی اجاگر کرتے ہوئےشاہ محمود قریشی نے کہا کہ مقبوضہ کشمیرکامعاملہ بھارت کااندرونی معاملہ نہیں ہے، پاکستان نے بھارت کو کئی بار مذاکرات کا کہا لیکن اس نے پاکستان کی مذاکرات کی تمام پیش کش مسترد کیں۔

خطاب کے دوران وزیرخارجہ نے بتایا کہ مقبوضہ کشمیرکےلوگوں کو بغیر کسی وجہ کےگرفتار کیاجارہاہے۔بھارت نے بین الاقوامی قوانین کی خلاف ورزی کرتےہوئےکلسٹر اور ہیوی بموں کا استعمال کیا۔بھارت اپنے مظالم چھپانےکیلیے کشمیریوں کی جدوجہد آزادی کو دہشتگردی کا رنگ دےرہاہے۔

وزیرخارجہ نےخطاب کےدوران مطالبہ کیا کہ انسانی حقوق کونسل کےاداروں اورانٹرنیشنل میڈیاکومقبوضہ کشمیرمیں رسائی جائے۔ انسانی حقوق کونسل عالمی انسانی حقوق کی محافظ ہےاوراقوام متحدہ کاتیسرا فعال ستون ہے۔بھارت مقبوضہ کشمیر میں انسانی حقوق، میڈیا نمائندوں کو جانے کی اجازت دے۔ آخر کس مقصد کےلیے مقبوضہ کشمیرمیں دس لاکھ فوجی موجود ہیں؟

انہوں نے مزید کہا کہ بھارت مقبوضہ کشمیرمیں لوگوں کے بنیادی حقوق اپنے پاؤں تلے روند رہاہے،بھارت سےکوئی پوچھنے والا نہیں۔

انسانی حقوق کونسل سے خطاب میں وزیرخارجہ کامزیدکہناتھاکہ بھارت کےزیرقبضہ جموں کشمیرکےعوام کی استدعااورمقدمہ لےکرآیا ہوں، مقبوضہ کشمیرمیں چھ ہفتوں میں بھارت ظلم وبربریت کی شدت میں کئی گنااضافہ ہوچکاہے۔بھارت منظم اندازسے مقبوضہ خطے کے عوام کو ظلم وستم کا نشانہ بنارہا ہے اور80لاکھ سے زائد کشمیریوں کو 6 ہفتوں سے قید کیاگیا ہے۔