وزیراعظم  کی معاون خصوصی برائے اطلاعات فردوس عاشق اعوان کا کہنا ہے کہ یورپین پارلیمنٹ نے کشمیرسے فوری کرفیو اٹھانے کا مطالبہ کیاہے۔

سماجی رابطے کی ویب سائٹ ٹویٹر پر فردوس عاشق اعوان نے اپنے پیغام میں کہا کہ بھارتی گھمنڈ اور تکبر خاک میں مل رہا ہے، بھارت کو ہرطرف سے منہ کی کھانی پڑ رہی ہے، یورپین پارلیمنٹ نے کشمیرکی صورت حال کو تشویش ناک قرار دیا، یورپین پارلیمنٹ نے کشمیرسے فوری کرفیو اٹھانے کا مطالبہ کیا۔

بھارتی گھمنڈ اور تکبر خاک میں مل رہا ہے ، ہر طرف سے اسے منہ کی کھانی پڑ رہی ہے۔یورپین پارلیمنٹ نے مقبوضہ کشمیر کی صورتحال کو تشویشناک قرار دیتے ہوئے فوری کرفیو اٹھانے کا مطالبہ کیا ہے۔وہ دن دور نہیں جب وادی جنت نظیر میں آزادی کا سورج طلوع ہوگا۔

— Dr. Firdous Ashiq Awan (@Dr_FirdousPTI) September 3, 2019

فردوس عاشق اعوان نے مزید کہا کہ وہ دن دورنہیں جب جنت نظیروادی میں آزادی کا سورج طلوع ہوگا، کشمیریوں کی آہوں اورسسکیوں نےعالمی ضمیرجھنجھوڑ کر رکھ دیا، بھارت حق اورسچ کی آواز نہیں دبا سکتا، مقبوضہ کشمیرکے عوام کے قانونی حقوق کی آواز یورپی پارلیمنٹ میں سنی گئی۔

واضح رہے کہ یورپین پارلیمنٹ کی خارجہ امور کمیٹی کے اجلاس میں بھارت کو شدید تنقید کا نشانہ بنایا گیا ہے۔

ارکان پارلیمنٹ نے بھارت سے مطالبہ کیا ہے کہ مقبوضہ کشمیر سے کرفیو فوراً ہٹایا جائے، مودی انتظامیہ کا رویہ قابل مذمت ہے۔

اجلاس کےدوران شرکا نے مودی سرکار سے مطالبہ کیا کہ مقبوضہ کشمیر سے بھارتی آئین کے آرٹیکل 370 اور دفعہ 35 اے ختم کرنے کے فیصلے کو فوری طور پر واپس لیا جائے۔

اس کے علاوہ یورپی پارلیمنٹ نے مطالبہ کیا کہ بھارت کو مذاکرات فوری شروع کرنا چاہئیں۔