وزیراعلیٰ سندھ سید مراد علی شاہ نے کہا ہے کہ صفائی کے کام میں جو بھی رکاوٹ ڈالنے کی کوشش کرے اس کو گرفتار کرلیا جائے۔

تفصیلات کے مطابق وزیراعلیٰ سندھ سید مراد علی شاہ کی زیر صدارت کلین مائی کراچی کے حوالے سے اجلاس ہوا، جس میں وزیراعلیٰ سندھ نے تمام ایس ایس پیز اور ڈی سیز کو کلین مائی کراچی مہم میں ساتھ کام کرنے کی ہدایت کی۔

وزیراعلیٰ سندھ سید مراد علی شاہ کا اجلاس سے خطاب کرتے ہوئے کہنا تھا کہ یہ کچرا اٹھانے کی مہم بہت اچھی ہے، اس پر مکمل توجہ دی جائے۔

 کراچی صفائی مہم پر اجلاس میں بریفنگ کے دوران وزیر اعلیٰ کو بتا یا گیا کہ ضلع جنوبی سے2971 ٹن اور  ضلع غربی سے 15848 ٹن کچرا لینڈ فل سائٹ منقل کیا گیا ہے۔

وزیراعلیٰ سندھ نے تمام عارضی جی ٹی ایس سے سندھ ویسٹ مینجمنٹ اتھارٹی کو کچرا اٹھا کر لینڈ فل سائیٹ منتقل کرنے کی ہدایت کی اور کہا کہ سندھ ویسٹ مینجمنٹ اتھارٹی ڈی سیز سے عارضی جی ٹی ایس کی ایڈریس، لوکیشن وغیرہ حاصل کریں اور کام شروع کیا جائے۔

سید مراد علی شاہ نے کہا کہ جیسے ہی صفائی ہو جائے ڈی ایم سیز کے حوالے کریں تاکہ وہ خود یا سندھ ویسٹ مینجمنٹ اتھارٹی سے صفائی کرنے کو یقینی بنائیں۔

وزیراعلیٰ سندھ کا کہنا تھا کہ حالیہ بارشوں میں کچرا اٹھانے کے کام کو مزید تیز کیا جائے، شارع فیصل سے نیشنل اسٹیڈیم تک خصوصی صفائی کروائی گئی ہے۔

سید مراد علی شاہ کا یہ بھی کہنا تھا کہ کرکٹ ٹیمیں جن شاہراؤں سے گزریں ان جگہوں کو خوبصورت بنایا جائے، جہاں سڑکیں خراب ہوگئی ہیں ان کی دوبارہ مرمت کی جائے۔

وزیراعلیٰ سندھ سید مراد علی شاہ کا مزید کہنا تھا کہ کراچی کے کچھ علاقوں سے ایک گروپ نے ڈسٹ بن غائب کرنا شروع کیئے ہیں اور اس گروپ کا مقصد یہ ہے کہ ڈسٹ بن نہیں ہوں گے تو کچرا سڑکوں پر پھینکا جائے گا۔

اجلاس میں چیف سیکریٹری ممتاز شاہ، وزیر محنت سعید غنی، وزیر بلدیات سید ناصر شاہ، صوبائی مشیر مرتضیٰ وہاب، پرنسپل سیکریٹری ساجد جمال ابڑو، سیکریٹری بلدیات روشن شیخ، ایم ڈی سندھ ویسٹ مینجمنٹ اتھارٹی آصف اکرام نے شرکت کی۔