وزیراعظم عمران خان نے وزیراعلیٰ پنجاب کو اسلام آباد طلب کر لیا ، ذرائع کا کہنا ہے کہ عمران خان پنجاب پولیس کی کارکردگی سے ناخوش ہیں۔

تفصیلات کے مطابق وزیراعظم نےوزیراعلیٰ پنجاب عثمان بزدار کواسلام آبادطلب کرلیا ہے، وزیراعلیٰ پنجاب وزیراعظم سے ملاقات کریں گے اور پولیس ریفارمز سے متعلق انھیں آگاہ کریں گے اور بریفنگ دیں گے۔

وزیراعظم نے پنجاب میں پولیس گردی کے واقعات پر ناراضگی اور تشویش کا اظہار کیا تھا۔

اطلاعات کے مطا بق وزیراعلیٰ پنجاب لاہور سے اسلام آباد پہنچ گئے ہیں ، جہاں ان کی وزیراعظم سے ون آن ون ملاقات ہوگی ، جس میں پنجاب پولیس نظام میں اصلاحات پر بات چیت کریں گے۔

واضح رہے کہ پنجاب میں 8 ماہ میں پولیس کی حراست میں 17 ملزمان کی ہلاکتوں کا انکشاف ہوا ہے ۔14 ہلاکتوں پر 84 پولیس افسران و اہلکاروں کے خلاف مقدمات درج ہوئے ہیں، پنجاب پولیس ناقص کارکردگی کو بچانے کے لیے واقعات کو دبانے پر مصروف عمل ہے۔

چند روز قبل بھی اے ٹی ایم کارڈ چرانے والے صلاح الدین کو پولیس نے دوران حراست تشدد کرکے ہلاک کردیا تھا اور پولیس نےکہا کہ وہ دل کا دورہ پڑنے سے چل بسا، عثمان بزدار نے اس واقعے کا نوٹس لیا تھا ، جس کے بعد انچارج سی آئی اے سمیت چار پولیس اہلکاروں کو معطل کرکے ان کے خلاف مقدمہ درج کرلیا گیا تھا۔