آزاد کشمیر میں زلزلے کے آفٹر شاکس جاری ہیں جبکہ جاں بحق افراد کی تعداد 30ہوگئی اور 450 سے زائد افراد زخمی ہیں۔

تفصیلات کے مطا بق پاکستان کے مختلف علاقوں میں گزشتہ روز آنے والے زلزلے سے جاں بحق والوں کی تعداد 30 ہوگئی جبکہ 450 سے زائد زخمی افراد مختلف علاقوں میں زیرعلاج ہیں

حکومت آزاد کشمیر نے میرپور زلزلہ کے باعث آج ضلع میرپور کے تمام سرکاری و پرائیویٹ تعلیمی اداروں میں عام تعطیل کا اعلان بھی کیا ہے۔

آزاد کشمیر میں زلزلے کے مزید جھٹکے محسوس ہوئے ہیں جس کے بعد لوگ کلمہ طیبہ کا ورد کرتے ہوئے گھروں سے نکل آئے، خوف کے باعث مردوں نے سڑکوں کے کنارے گرین بیلٹ پر  رات جاگ کر گزاری جبکہ خواتین اور بچوں نے مقامی پارکوں میں پناہ لی۔

ضلعی انتظامیہ کے مطابقزلزلے میں زخمی افراد ڈی ایچ کیو میرپور اور ٹی ایچ کیو منڈاں میں زیرعلاج ہیں جبکہ پمزاسپتال کی 3 ایمبولینسز، ڈاکٹرز اور اسٹاف کے 12 افراد سب سے زیادہ متاثر ہونے والے علاقے میرپور کے لئے روانہ کردیے گئے ہیں۔

وزیراعظم آزاد کشمیر کا زلزلے سے متاثرہ علاقوں کی بحالی کے لیے لائحہ عمل کا اعلان

وزیراعظم آزاد کشمیر راجا فاروق حیدر نے زلزلے سے متاثرہ علاقوں کی بحالی کے لیے لائحہ عمل کا اعلان کردیا ہے۔

زلزلے کی اطلاع ہی میر پور آزاد کشمیر پہنچنے پر راجا فاروق حیدر نے کہا کہ زلزلے سے متاثرہ علاقے میں سب سے پہلے ریسکیوکارروائی ہوگی۔

انہوں نے مزید کہا کہ ریسکیو کارروائی کے بعد نقصانات کا جائزہ لیا جائے گا اور پھر بحالی کا کام شروع ہوگا۔

وزیراعظم آزاد کشمیر راجا فاروق حیدر نے زلزلے کے زخمیوں کی عیادت کی اور ان کی دیکھ بھال پر مامور ڈاکٹروں کو ضروری ہدایات بھی دیں۔

وا ضح رہے کہ گزشتہ روز آنے والے زلزلے کی شدت 5 اعشاریہ 8 ریکارڈ کی گئی تھی، جس کی گہرائی زیرِ زمین 10 کلومیٹر تھی،زلزلہ پیما مرکز کے مطابق سہ پہر 4 بج کر 2 منٹ پر آنے والے زلزلے کا مرکز جہلم کا شمالی علاقہ تھا۔

زلزلے سے متاثرہ علاقوں میں شہریوں کودوہری مصیبت کا سامنا ہے،زلزلے سے لوگوں کے گھر اور کاروبار تباہ ہوگئے ہیں، متاثرہ علاقوں میں زلزلے کے بعد سے اب تک بجلی بحال نہ کی جاسکی، بجلی کے کھمبے اوران پرلگے ٹرانسفارمرزمین پرتاحال  گرے ہوئے ہیں جب کہ پینے کی پانی کی بھی شدید قلت ہوگئی۔

زلزلے کے باعث کھانے پینے سے محروم لوگوں نے زلزلے کے آفٹر شاکس کے خوف سے رات جاگ کر گزاری، لوگوں کے گھروں کی بیرونی دیواریں گرنے سے پل منڈا، سانگ، سنوال شریف سمیت ملحقہ علاقوں میں چوری کی بھی وارداتیں ہوئیں ہیں۔