احتساب عدالت نے سابق وزیر اعلیٰ پنجاب شہباز شریف کے بیٹے سلمان شہباز کو اشتہاری قرار دے دیا۔

تفصیلات کے مطا بق منی لانڈرنگ کیس میں بڑی پیش رفت سا منے آئی ہے، احتساب عدالت نے سابق وزیر اعلیٰ پنجاب شہباز شریف کے بیٹے سلمان شہباز کو اشتہاری قرار دے دیا اور سلمان شہباز کی تمام منقولہ اور غیر منقولہ جائیدادوں کو بھی ضبط کرلیا گیا ہے۔

ذرائع کے مطا بق نیب حکام نے منی لانڈرنگ کیس میں بار بار طلبی کے باوجود پیش نہ ہونے پر سلمان شہباز کی جائیدادوں کوضبط کرنے اور اشتہاری قرار دینے کی استدعا کی تھی۔

نیب نے موقف اختیار کیا کہ سلمان شہباز کی رہائش گاہ پر بھی تحقیقات کے لیے گئے لیکن وہ وہاں موجود نہیں تھے، عدالت سلمان شہباز کو اشتہاری قرار دینے کا حکم دے۔

ذرائع کے مطا بق عدالت نے سلمان شہباز کی رقوم منجمد کر دیں جبکہ سلمان شہباز کی زرعی اراضی سمیت تمام جائیدادوں کو بھی ضبط کرنے کا حکم دیتے ہوئے اشتہاری قرار دے دیا ہے۔

واضح رہے کہ گزشتہ ماہ نیب نے عدالتی حکم پر سلمان شہباز کی تمام منقولہ اور غیر منقولہ جائیداد ضبط کر لی تھی۔
نیب کے زیرحراست دو وعدہ معاف گواہوں، آفتاب محمود اور شاہد رفیق نے شہباز شریف اور ان کے دونوں صاحبزادوں کے لیے منی لانڈرنگ کرنے کا اعتراف بھی کیا تھا۔

ذرائع کے مطا بق دونوں وعدہ معاف گواہوں نے اعتراف کیا کہ انہوں نے سابق وزیراعلیٰ پنجاب شہباز شریف اور ان کے دونوں بیٹوں کے کہنے پر پاکستان میں 24 لاکھ ڈالر سے زیادہ رقم ٹی ٹی کے ذریعے منتقل کی تھی۔