وزیراعظم عمران خان نے کہا ہے کہ سرمایہ کاری کی راہ میں سب سے بڑی رکاوٹ کرپشن ہے۔

تفصیلات کے مطابق وزیراعظم عمران خان نے گڈانی میں چائنہ پاور حب جنریشن پلانٹ کی افتتاحی تقریب سے خطاب کرتے ہوئے کہا کہ بڑی بڑی چینی کمپنیاں پاکستان آنا چاہتی ہیں لیکن کرپشن کی وجہ سےبڑی مائننگ کمپنیاں پاکستان نہیں آتیں جبکہ چین اور پاکستان کے درمیان پاورپلانٹ سی پیک کا پہلا مشترکہ منصوبہ ہے۔

وزیراعظم کا کہنا تھا کہ پاکستان کاسب سےبڑامسئلہ کرنٹ اکاؤنٹ خسارہ ہے لیکن پی ٹی آئی حکومت آنے کے بعد کاروبار میں مسلسل آسانیاں پیداہورہی ہیں۔

تقریب سے خطاب کرتے ہوئےعمران خان کا یہ بھی کہنا تھا کہ ہماری سب سےبڑی طاقت نوجوان ہیں اورہمیں اپنی نوجوان آبادی کو اثاثہ بناناہے۔

وزیراعظم نے کہا کہ کوشش کریں کہ 20فیصد کوئلہ تھرکاہوتاکہ زرمبادلہ کی بچت ہو کیونکہ ماضی میں پانی سے بجلی بنانے پرکام نہیں کیاگیا۔

وزیراعظم عمران خان کا اپنے بیان میں مزید کہنا تھا کہ اپنےوسائل سےبجلی بنانے سے آسانیاں پیداہونگی، ہم چاہتے ہیں پاور پراجیکٹ لوکل ریسورسزسے بنے۔

اس موقع پر وزیراعظم عمران خان کے ہمراہ وزیر اعلیٰ بلوچستان جام کمال خان نے بھی گڈانی میں چائنہ پاور حب جنریشن پلانٹ کی افتتاحی تقریب میں شریک کی۔

واضح رہے اس سے قبل وزیراعظم عمران خان ایک روزہ دورے پر کراچی پہنچ گئے ہیں،گورنر سندھ عمران اسماعیل نے عمران خان سے ملاقات کی تھی۔

اس موقع پروفاقی وزیر پارلیمانی امور اعظم خان سواتی، وزیر منصوبہ بندی مخدوم خسرو بختیار، وزیر آبی وسائل فیصل واوڈا، معاون خصوصی ندیم بابر اور ممبر قومی اسمبلی اسد عمر بھی وزیر اعظم کے ہمراہ ہیں۔

 وزیراعظم کی زیرصدارت گورنر ہاؤس میں اجلاس کے دوران وفاق کے زیر انتظام کراچی میں جاری منصوبوں پر پیشرفت رپورٹ پیش کی گئی اور وزیراعظم کو کراچی پیکج کے تحت تجویز کردہ اسکیمز کے بارے میں بھی آگاہ کیا گیا تھا ۔