وزیر اعظم عمران خان نے سعودی عرب اور ایران کے درمیان ثالثی کی کوششیں تیز کردی ہیں، اسی سلسلے میں کل سعودی عر ب کے لئے روانہ ہو ں گے۔

تفصیلات کے مطا بق تہران اور ریاض میں کشیدگی کم کرانے کا مشن جاری وساری ہے، وزیراعظم ایک روزہ دورہ ایران کے بعد وطن واپس پہنچ گئے ہیں  اور اب  وزیر اعظم عمران خان کل سعودی عرب جائیں گے، ریاض دورے کے موقع پر سعودی فرما نرواں شاہ سلمان اور ولی عہد محمد بن سلمان سے ملاقات کریں گے جس میں خطے میں بڑھتی کشیدگی پر تبادلہ خیال کیا جائے گا۔

ذرائع کے مطا بق  وزیر اعظم عمران خان گذشتہ روز ایک روزہ دورے پر تہران پہنچے، ایرانی صدر حسن روحانی اور سپریم لیڈر علی خامنہ ای سے ملاقاتیں کیں ،مشترکہ اعلامیے کے مطابق وزیراعظم  عمران نے خلیجی ممالک کو ممکنہ فوجی تنازع سے بچانے پر زور دیتے ہو ئے کہا کہ خلیجی ممالک میں تمام فریقین بات چیت سے مسائل حل کریں۔

اعلامیے میں کہا گیا کہ وزیر اعظم  عمران خان نے پاکستان اور ایران کے درمیان تاریخی اور ثقافتی تعلقات کی اہمیت کو اجاگر کیا اور مختلف شعبوں میں باہمی تعاون کے فروغ کا اعادہ کیا، وزیراعظم نے صدر روحانی کو 5اگست کے بھارتی اقدام  سے آگاہ کرتے ہو ئے کہا کہ  مقبوضہ کشمیر کی موجودہ صورتحال سے خطے کا امن  خطرے میں ہے۔

شاہ محمود قریشی کا کہنا ہے کہ وزیر اعظم پاکستان امن کے لیے ایک کوشش کرنے جا رہے ہیں، تیل پیدا کرنے والی قوتوں میں لڑائی کا نتیجہ اچھا نہیں ہوگا۔