معاون خصوصی ڈاکٹر فردوس عاشق اعوان نے کہا ہے کہ عمران خان طاقتور مجرموں کے خلاف جہاد کر رہے ہیں۔

معاون خصوصی اطلاعات فردوس عاشق اعوان اور وزیر قانون فروغ  نسیم کی مشترکہ پریس کانفرنس میں ڈاکٹر فردوس عاشق اعوان نے نواز شریف کی حالت ناساز ہونے پر کہا کہ رات بارہ بجے میاں نوازشریف کو ہسپتال منتقل کیا جارہا تھا تو ساتھ بیان چل رہا تھا کہ انہیں زہر دینے کی کوشش کی گئی جبکہ حکومت کو کسی سیاسی مخالف کو زہر دینے کی ضرورت نہیں ہے کیونکہ کرپشن ہی ان کے لیے زہر ہے۔

وفاقی کابینہ کے اجلاس کے متعلق انکا کہنا تھا کہ کابینہ اجلاس کا 14 نکاتی ایجنڈا تھا جبکہ اجلاس میں تاریخ ساز قانونی اصلاحات ہوئی ہیں۔

انہوں نے بتایا کہ بچوں کے جنسی استحصال کی روک تھام کے کیے آگاہی مہم چلائی جائے گی جبکہ وزیراعظم صوبوں کے ساتھ مل کر مہنگائی کو کنٹرول کرنے کے کیے کام کر رہے ہیں اور نیب کی درخواست پر کابینہ ڈویژن اسے ریکارڈ فراہم کرے گا۔

معاون خصوصی نے بتایا کہ کابینہ اجلاس میں پاک فوج کے کنٹونمنٹس میں سولر سے بجلی حاصل کرنے کے منصوبوں کی اصولی منظوری دی گئی ہے جبکہ کابینہ نے پانچ ارب روپے کے بلا سود قرض دینے کی منظوری بھی دی ہے اور یہ قرضے ایک سے چار سال کی مدت کے لیے دیے جائیں گے۔

دوسری جانب وزیر قانون فروغ نسیم نے کہا ہے کہ کابینہ میں عوامی مفاد کے آٹھ قوانین کی منظوری دی گئی ہے جکہ سستے اور فوری انصاف کی فراہمی کے بارے اسٹیٹس کو تبدیل نہیں کیا جا سکتا لیکن انگریز دور کے سول پروسیجر کوڈ میں ترمیم کا فیصلہ کیا گیا ہے کیونکہ ترامیم کا مقصد مقدمات کے جلد فیصلوں کو یقینی بنانا ہے۔

انکا مزید کہنا تھا کہ مقدمات کے جلد فیصلے کے کیے دوسری اپیل ختم کردی گئی ہے جبکہ خواتین کا وراثت میں حصہ یقینی بنانے کے کیے آرڈیننس لایا جارہا ہے اور غریب لوگوں کی داد رسی کے لیے لیگل ایڈ اینڈ جسٹس اتھارٹی قائم کی جارہی ہے۔

فروغ نسیم نے بتایا کہ ججوں کو اپنا ڈریس کوڈ خود طے کرنے کا موقع دیا جارہا ہے جبکہ اوورسیز پاکستانیز کے لیے بھی ایک قانون لایا جارہا ہے۔