وزیراعظم عمران خان کی زیر صدارت وفاقی کابینہ کا اجلاس شروع ہو گیا ہے۔

تفصیلات کے مطا بق اجلاس میں ملکی سیاسی، معاشی صورتحال کا جائزہ لیا جائے گا، اپوزیشن کے آزادی مارچ پر بھی اجلاس میں بات چیت ہوگی اور اس سلسلے میں بڑے فیصلوں کا بھی امکان ہے۔

ذرائع کے مطا بق وفاقی کابینہ کے اجلاس کا 13 نکاتی ایجنڈا جاری کر دیا گیا، وزارتوں میں موجود سی ای او ز، ایم ڈیز کی خالی پوسٹوں پر بریفنگ دی جائے گی، کراچی، لاہور، ملتان اور پشاور میں کثیر المنزلہ عمارتوں کا معاملہ زیر غور آئے گا، سول ایوی ایشن رولز 1994 میں ترمیم کا معاملہ بھی زیر بحث آئے گا۔

وزیراعظم عمران خان کی زیر صدارت کابینہ فیڈرل گورنمنٹ آرٹسٹ فنڈ کابینہ ڈویژن سے انفارمیشن ڈویژن کو منتقل کرنے کی منظوری دے گی، وزیر اقتصادی امور کی بطور ممبر این ای سی منظوری دی جائے گی، سینٹرل ڈائریکٹوریٹ آف نیشنل سیونگز کے ڈی جی کی تنخواہ مقرر کرنے کی منظوری بھی دی جائے گ۔

اس کے ساتھ ساتھ اسلام آباد ہیلتھ کیئر فیسلٹیز مینجمنٹ ایکٹ 2019 کی منظوری دی جائے گی، سوئی نادرن گیس کمپنی لمیٹڈ کے بورڈ آف ڈائریکٹرز کی از سر نو منظوری دی جائے گی۔

واضح رہے کہ ذرائع کا کہنا ہے کہ پرویزخٹک نے رہبر کمیٹی سے مذاکرات کی رپورٹ بھی تیار کرلی ہے، رپورٹ کے نکات میں کہا گیا تھا کہ آزادی مارچ ایک معاہدے کے تحت ہورہا ہے، رہبرکمیٹی میں تمام جماعتوں سے رابطے ہوئے، آزادی مارچ والوں کو معاہدے کے نکات کی پابندی کرنا ہوگی۔

پرویز خٹک کی رپورٹ کے نکات میں یہ بھی بتایا گیا ہے کہ حکومت نے آزادی مارچ میں اب تک کوئی رکاوٹ نہیں ڈالی، معاہدے کے تحت آزادی مارچ جلسہ گاہ تک محدود رہے گا۔