وزیراعظم عمران خان کی زیر صدارت تحریک انصاف کی کور کمیٹی کا اجلاس جاری ہے۔

تفصیلات کے مطابق تحریک انصاف کی کور کمیٹی اجلاس میں پنجاب اور خیبرپختونخوا کے وزرائے اعلیٰ، گورنرز، وفاقی وزرا اور سینئر پارٹی قیادت شریک ہے۔

ذرائع کے مطابق مولانا فضل الرحمان کے آزادی مارچ سے متعلق کور کمیٹی کی مشاورت جاری ہے جبکہ اس کے ساتھ ساتھ ملک کے سیاسی، معاشی معاملات اور مہنگائی سے متعلق امور پربھی غور کیا جائے گا۔

اس کے علاوہ وزیر اعظم عمران خان دورہ سعودی عرب، ایران اور دورہ چین پروزراکو اعتماد میں لیں گے، اجلاس میں پارٹی کی صوبائی تنظیموں کو تحلیل کرنے کا معاملہ بھی زیر غور آئے گا۔اس اہم اجلاس میں آزادی مارچ سے نمٹنے کی حکمت عملی پر مشاورت کی جائے گی۔

وفاقی وزیر ریلوے شیخ رشید کا آزادی ما رچ کے بارے میں کہنا ہے کہ مولانا فضل الرحمان محفوظ راستہ چاہتے ہیں اور ان سے رابطے جاری ہیں،23 سے 26 اکتوبر کے درمیان اچھی خبریں ملیں گی۔

آزادی ما رچ کے حوالے سے جے یوآئی ف کے حزب اختلاف کی جماعتوں سے رابطوں میں بھی تیزی آگئی ہے،نیشنل پارٹی کے سربراہ میرحاصل بزنجو نے مولانا فضل الرحمان سے ملاقات کی جبکہ رہنما نیشنل پارٹی نے آزادی مارچ میں مولانا فضل الرحمان کے ساتھ کندھے سے کندھا ملانے کا اعلان کردیا۔

آزادی ما رچ کے حوالے سے مولانا فضل الرحمن اور شہباز شریف کی ملاقات کی تاریخ بھی تبدیل کر دی گئی ہے، اب ملاقات لاہور میں سولہ اکتوبر کی بجائے اٹھارہ اکتوبر کو ہوگی۔ دونوں رہنما مشترکہ پریس کانفرنس میں آئندہ لائحہ عمل کا اعلان بھی کریں گے۔