وزیر اعظم عمران خان کا کہنا ہے کہ پاکستان نے اقوام متحدہ کے چارٹر پر مکمل طور عمل پیرا ہوکر اپنا کردار اداکیا ہے۔

تفصیلات کے مطابق اقوام متحدہ کےعالمی دن پر وزیر اعظم عمران خان نے اپنے ایک  پیغام میں کہا ہے کہ آج کا دن ہمیں یاد دلاتا ہے کہ ہم اقوام متحدہ کےچارٹرکیمکمل بحالی کے لیے بھرپور کردار ادا کریں۔

وزیر اعظم کا کہنا تھا کہ یہ دن اقوام متحدہ کے چارٹر پر عملداری کےعزم کی یاد دہانی کرانے کے ساتھ ساتھ کلونیلزم کے خلاف اور بنیادی انسانی حقوق کے تحفظ کےلئے کردار ادا کرنے کا بھی سبق دیتا ہے۔

عمران خان کا یہ بھی کہنا تھا کہ اقوام متحدہ کا ادارہ دنیا میں سامراجی طاقتوں کےخاتمے کی نوید کے ساتھ ابھرا جبکہ اقوام متحدہ کے قیام سے دنیا  کے مختلف خطوں میں پھیلی بے چینی  اور ناانصافی کے خاتمے میں بھی مدد ملی۔

اپنے پیغام میں وزیر اعظم نے کہا کہ کشمیری گزشتہ72 سال سے بھارتی جبر وتسلط برداشت کر رہے ہیں، اقوام متحدہ کا یہ فرض بنتاہے کہ کشمیریوں کو ان کا حق خود ارادیت دلائے۔

عمران خان نے یہ بھی کہا کہ جموں کشمیر کی عوام عالمی برادری کی طرف دیکھ رہی ہے کیونکہ جموں کشمیر کا تنازعہ اقوام متحدہ  کی سیکورٹی کونسل کا پرانا ترین ایشو ہے اور کشمیری منتظر ہیں کب عالمی برادری اپنے وعدے پورے کریگی۔

وزیر اعظم عمران خان کا مزید کہنا تھا کہ پاکستان اقوام متحدہ سے توقع کرتا ہے کہ ادارہ کشمیر سے متعلق جلد اپنی قرارداد پر عمل درآمد کروائے گا۔