وفاقی وزیر شیخ رشید کا کہنا ہے کہ شہباز شریف وکٹ کے دونوں طرف نظر آتے ہیں ، شہباز شریف کو کہا ہے ایک طرف کھیلیں، یا آسمان پر رہیں یا پھر اپنے قدم زمین پر رکھ لیں۔

ننکانہ صاحب کے دورے کے موقع پر وزیر ریلوے شیخ رشید نے کہا کہ 23 سے 26 اکتوبر کے درمیان آزادی مارچ پر اپنی رائے دوں گا، آزادی مارچ کے معاملے پر جمعیت علمائے اسلام (ف) کے سربراہ فضل الرحمان اور دوسرے لوگوں سے بات چیت جاری ہے اور یہ معاملہ ٹھیک ہو جائے گا۔

شیخ رشید نے میڈیا سے با ت چیت کر تے ہوئے کہا کہ قائد حزب اختلاف اور مسلم لیگ ن کے صدر شہباز شریف وکٹ کے دونوں طرف کھیل رہے ہیں، ان سے کہوں گا کہ ایک طرف کھیل لیں،پاکستان پیپلز پارٹی (پی پی پی) کے شہزادے نے اپنی تحریک شروع کر دی ہے،بلاول اسلام آباد نہیں جائے گا کیوں وہ ڈرتا ہے، اسے پتہ ہے کہ اسلام آباد میں مولوی دھرنا دے رہے ہیں۔

وفا قی وزیر کا کہنا ہے کہ ممکن ہے کہ مولانا کو کشمیر کی ریلی نکالنے کی اجازت مل جائے تاہم اسلام آباد میں دھرنے کی کوئی گنجائش نہیں، ممکن ہے کوئی درمیانی راستہ نکال لیا جائے اور مولانا صاحب کو فیس سیونگ مل جائے۔

وزیر ریلوے نے کہا کہ کشمیر پاکستان کے لیے زندگی اور موت کا مسئلہ ہے اور ہماری حکمت عملی سے بھارتی وزیراعظم نریندر مودی پھنستا جارہا ہے، یہ ایک دن کی لڑائی نہیں ہے،پاک فوج کسی بھی جارحیت کا منہ توڑ جواب دینے کے لیے ہر لمحہ تیار ہے، فضل الرحمان کے حوالے سے ہماری میڈیا پالیسی مناسب نہیں ہے، کابینہ اجلاس میں بھی کہا تھا کہ ہم مولانا کو زیادہ لفٹ کروارہے ہیں۔

شیخ رشید نے کہا کہ مولانا کو خومخوا کا ہوا بنا رکھا ہے، اسلام آباد میں سب اچھا ہے، جسے آنا ہے آ جائے۔

اس مو قع پر شیخ رشید نے بابا گرونانک ریلوے اسٹیشن پر جاری ترقیاتی کام کا جائزہ بھی لیا۔

وزیر ریلوے شیخ رشید نے کہا کہ ریلوے میں نیا ٹریکر سسٹم متعارف کرایا ہے،  کوشش ہے کہ بابا گرونانک ریلوے اسٹیشن بابا گورو نانک کی 550 ویں جنم دن سے قبل مکمل ہو جائے۔

شیخ رشید نے اپیل کی کہ ننکانہ صاحب علاقے کے لوگ خالصتان سے آئے یاتریوں کی خاص طور پر آؤ بھگت کریں۔