وزیر اعظم عمران خان کی خصوصی ہدایت پر قائم کیے گئے “کشمیر سیل” کا چوتھا اجلاس وزیر خارجہ مخدوم شاہ محمود قریشی کی زیرصدارت، وزارت خارجہ میں ہوا ۔

 تفصیلات کے مطابق اجلاس میں وزیر اعظم آزاد کشمیر راجہ فاروق حیدر ، وفاقی وزیر ریلوے شیخ رشید، چیرمین پارلیمانی کمیٹی برائے کشمیر سید فخر امام، سول و عسکری حکام اور وزارت خارجہ کے سینئر افسران شریک ہوئے۔

وزیر خارجہ نے اجلاس کے شرکاء کو وزیر اعظم عمران خان کے حالیہ دورہ امریکہ، اقوام متحدہ جنرل اسمبلی کے چوہترویں اجلاس کے موقع پر مختلف ممالک کے سربراہان مملکت اور انسانی حقوق پر کام کرنے والی بین الاقوامی تنظیموں کے ساتھ ہونے والی میٹنگز کی تفصیلات سے آگاہ کیا۔

اجلاس میں مسئلہ کشمیر کو مختلف بین الاقوامی فورمز پر مزید اجاگر کرنے کے حوالے سے تفصیلی مشاورت کی گئی۔

مخدوم شاہ محمود قریشی نے بتایا کہ وزیر اعظم عمران خان نے اقوام متحدہ جنرل اسمبلی کے اجلاس کے موقع پر 120 کے قریب بین الاقوامی ملاقاتیں/روابط کئے جن میں مختلف سربراہان مملکت کے علاوہ انسانی حقوق کی تنظیموں اور بین الاقوامی میڈیا کے ساتھ بات چیت شامل ہے۔

انکا کہنا تھا کہ وزیر اعظم عمران خان نے اقوام متحدہ جنرل اسمبلی کے چوہترویں اجلاس میں جس طرح اپنی تقریر میں نہتے کشمیریوں کا مقدمہ پیش کیا وہ اپنی مثال آپ ہے جبکہ آج ہندوستان کے سفاکانہ طرز عمل کے خلاف دنیا بھر سے آوازیں اٹھ رہی ہیں۔

اجلاس میں وزیر اعظم آزاد کشمیر راجہ فاروق حیدر ، وفاقی وزیر ریلوے شیخ رشید، چیرمین پارلیمانی کمیٹی برائے کشمیر سید فخر امام، سول و عسکری حکام اور وزارت خارجہ کے سینئر افسران شریک ہوئے