برطانوی شہزادہ ولیم اورشہزادی کیٹ مڈلٹن چترال پہنچ گئے ہیں۔ 

تفصیلات کے مطابق برطانوی شاہی جوڑاہیلی کاپٹرمیں کوہ ہندوکش کے خوبصورت نظاروں سے لطف اندوزہوا، برطانوی شہزادے اور شہزادی کو اس موقع پرروایتی ٹوپی بھی پہنائی گئی جبکہ شہزادہ ولیم کو روایتی چغہ اور شہزادی کیٹ کو شال کا بھی تحفہ دیا گیا۔

ذرائع کےمطابق برطانوی شاہی جوڑا اسلام آباد سے چترال پہنچا تو ان کا شاندار استقبال کیا گیا ، شہزادہ ولیم اور کیٹ مڈلٹن چترال میں بروغل اور ویلج بمبوریت کا دورہ کریں گے۔

شہزادہ ولیم کی والدہ پرنسز ڈیانا نے بھی 1991 میں چترال کا دورہ کیا تھا۔

واضح رہے کہ برطانوی شاہی جوڑے نے گزشتہ روز اسلام آباد میں مصروف دن گزارا، شہزادہ ولیم اور شہزادی کیٹ مڈلٹن نے کل دو پہرصدرمملکت عارف علوی اور وزیراعظم پا کستان عمران خان سے ملاقاتیں کیں۔

 ایوان صدر پہنچنے پر صدر مملکت عارف علوی جبکہ وزیراعظم ہاؤس آمد پرعمران خان نے شاہی جوڑے کا استقبال کیا تھا۔

اس ملاقات کے دوران وزیراعظم عمران خان نے شاہی جوڑے کا خیرمقدم کرتے ہوئے لیڈی ڈیانا سے پاکستانی عوام کی والہانہ محبت کی یاد دلادی۔

عمران خان نےجدید دنیا کو درپیش موسمیاتی تبدیلیوں،عدم مساوات اور تعلیم جیسے چیلنجزکےمعاملات سے متعلق آگاہی پھیلانے پر شاہی جوڑے کی کوششوں کوبھی سراہا۔

 انہوں نےمزید کہا کہ شاہی جوڑے کے پاکستانی نوجوان طبقے کیساتھ روابط اورمثبت سرگرمیاں قابل تحسین ہیں۔