چار سال تک اقوام متحدہ میں پاکستان کی مستقبل مندوب رہنے والی ملیحہ لودھی کا کہنا ہے کہ ملک کی خدمت کرنا میرے لیے اعزاز ہے، 4 سال خدمت کا موقع ملنے پر شکر گزار ہوں۔

ایک بیان میں ملیحہ لودھی نے نئے تعینات ہونے والے مندوب منیر اکرم کے لیے نیک خواہشات کا اظہار کرتے ہوئے کہا کہ اہم عالمی فورم پر پاکستان کی نمائندگی کرنا اعزاز ہے۔

ملیحہ لودھی کا مزید کہنا کہ وزیر اعظم عمران خان کے دورے کے لیے جو تعریف ملی اس پر خوشی ہے، خواہش تھی کہ وزیراعظم کے کامیاب دورے پر سفارتکاری کی میعاد ختم کرتی۔

ترجمان دفتر خارجہ کے مطابق ڈی جی یو این خلیل احمد ہاشمی کو جنیوا میں مستقل نمائندہ مقرر کیا گیا ہے، پیانگ یانگ میں ناظم الامور سید سجاد حیدر کو کویت میں سفیر مقرر کردیا گیا ہے۔

ڈاکٹر فیصل کے مطابق ٹورنٹو میں قونصل جنرل عمران صدیقی کو ڈھاکا میں پاکستانی ہائی کمشنر مقرر کیا گیا ہے، ایڈیشنل سیکریٹری محمد اعجاز ہنگری میں پاکستان کے سفیر ہوں گے۔

ترجمان دفتر خارجہ کے مطابق عبدالحمید کو پاکستانی سفارتخانے ٹورنٹو میں قونصل جنرل تعینات کیا گیا ہے، ابرار ہاشمی کو ہیوسٹن میں قونصل جنرل تعینات کردیا گیا ہے۔

ترجمان دفتر خارجہ کا کہنا ہے کہ محمد سعد خٹک سری لنکا میں پاکستانی ہائی کمشنر ہوں گے۔

واضح رہے کہ وزیراعظم  نے وزارت خارجہ میں تقرر و تبادلوں کی منظوری دی جس کے مطابق ملیحہ لودھی کی جگہ سینئر سفارتکار منیر اکرم کو اقوام متحدہ میں پاکستان کا مستقل مندوب مقرر کیا گیا ہے۔

ملیحہ لودھی کو فروری 2015ء میں اقوام متحدہ میں پاکستان کی مندوب مقرر کیا گیا تھا جس کے بعد انہوں نے وفاق میں حکومت کے تبادلے کے باوجود اپنی خدمات جاری رکھیں جبکہ دوسری جا نب منیر اکرم اس سے قبل 2002ء سے 2008ء کے دوران چھ سال تک اقوام متحدہ میں پاکستان کے مستقل مندوب کی حیثیت سے تعینات رہ چکے ہیں۔