وزیراعظم عمران خان سے جارج ٹاون یونیورسٹی میں اسلامی تاریخ کی پروفیسرڈاکٹر تمارا سون کی وزیراعظم آفس میں ملاقات ہوئی۔

ملاقات میں اسلام کی تاریخ، اسلامی تہذیب و تمدن، اسلام کی تعلیمات ، خصوصاً شاعر مشرق علامہ محمد اقبال کی دین اسلام کی تعلیمات ، شاعری اور فلسفے کے حوالے سے بات چیت کی گئی جبکہ نوجوان نسل میں اسلام کے اصل تشخص  کو اجاگر کرنے کے لئے اقدامات پر بھی خصوصی گفتگو کی گئی۔

اس موقع پر وزیراعظم عمران خان نے برصغیر پاک و ہند میں اسلام کی ترویج خصوصا صوفیائے کرام کی خدمات اور انکی تعلیمات کا ذکر کیا جبکہ عمران خان ڈاکٹر تمارا سون کی تعلیمی و تحقیقی کاوشوں خصوصا طلبا کواسلام کی تعلیمات سے روشناس کرانے کی کوششوں کو سراہا۔

وزیراعظم کا کہنا تھا کہ صوفی تعلیمات کا ان کی حقیقی روح کے مطابق ادراک اور نئی نسل کی صوفیائے کرام کے فلسفے سےآگاہی انتہائی اہمیت کی حامل ہے۔

عمران خان کا یہ بھی کہنا تھا کہ موجودہ دور کے چیلنجز سے نمٹنے کے لئے ضروری ہے کہ اسلام کے اصل تشخص اورصوفیائے کرام کی شخصیات جبکہ  انکی تعلیمات سے نوجوان نسل کو روشناس کرایا جائے۔

عمران خان  نے کہا کہ حکومت نے صوفی تعلیمات کی آگاہی اورنئی نسل میں ان تعلیمات کے ان کی اصل روح کے مطابق مطالعے کی غرض سے القادر یونیورسٹی کا کچھ عرصہ قبل سوہاوہ میں سنگ بنیاد رکھ دیا ہے۔

وزیراعظم عمران خان نے مزید کہا کہ تعلیمی اداروں میں صوفی تعلیمات کے حوالے سے مضامین متعارف کروانے کے ضمن میں وزارت تعلیم کے تحت ایک کمیٹی تشکیل دی جا رہی ہے جبکہ کمیٹی مضامین کی نوعیت اور نصاب کا تعین کرکےاپنی سفارشات پیش کرے گی۔

 اس موقع پر وزیر تعلیم شفقت محمود، صوبائی وزیر برائے ہائر ایجوکیشن پنجاب راجہ یاسر ہمایوں، وزیر تعلیم خیبر پختونخواہ ضیاء اللہ بنگش بھی موجود تھے۔