وزیراعظم عمران خان نے کہا کہ کاش میں چینی صدر کی طرح پاکستان میں بھی پانچ سو بد عنوان لوگوں کو جیل میں ڈال سکتا لیکن ہمارے ہاں نظام بہت آہستہ ہے۔

تفصیلات کے مطابق وزیر اعظم نے پاکستان اور چین میں تجارت اور سرمایہ کاری کانفرنس سے خطاب کرتے ہوئے کہا کہ چین نے اپنی غلطیوں سے سبق سیکھا، ہم بھی سیکھ رہے ہیں، چین نے 7 کروڑ لوگوں کو غربت کی لکیر سے نکالا۔

عمران خان نے کہا کہ ترقی پذیر ممالک کو چین سے سیکھںا چاہیے کہ بد عنوانی کو کیسے ختم کیا جائے، پاکستان میں ریڈ ٹیپ بھی کرپشن کی ایک وجہ ہے جس سے سرمایہ کاری ملک میں نہیں آتی اور ہم اس مسئلے کو حل کرنے کی کوشش کر رہے ہیں۔

وزیر اعظم کا کہنا ہے کہ چین کے غربت کے خاتمے کے لیے اقدامات سے متاثر ہوا، ایک زمانہ تھا کہ جب پاکستان بھی ترقی کی طرف گامزن تھا، چین کے کرپشن کے خلاف اقدامات انتہائی متاثر کن ہیں۔

انہوں نے کہا کہ چین نے 400 کے قریب وزرا کی سطح پر لوگوں کو جیل بھیجا، چینی صدر کے اقدامات سے بہت کچھ سیکھنے کو ملے گا،پاکستان میں سرمایہ کاری نہ آنے کی بڑی وجہ کرپشن ہے۔ کاش میں چینی صدر کی تقلید کرتے ہوئے 500 سیاسی شخصیات کو جیل بھیج سکتا۔

عمران خان نے کہا کہ ہم بیرونی سرمایہ کاری سے چین کی طرح لوگوں کو غربت سے نکالنا چاہتے ہیں،پاکستان میں سرمایہ کاری کے بے شمار مواقع ہیں کیوں کہ ہم نے آسانیاں پیدا کی ہیں، پاکستان چاہتا ہے کہ چین ٹیکسٹال، آئی ٹی، فنانس، زراعت، سیاحت، میں سرمایہ کاری کرے۔

وزیراعظم نے کہا کہ ہمارے ہاں رہائشی گھروں کی شدید قلت ہے، چین اس میں بھی سرمایہ کاری کر سکتا ہے۔

وزیر اعظم کا کہنا ہےکہ پاکستان میں سیاحت کے لیے بہترین مقامات موجود ہیں، پاکستان میں 5 سال میں 50 لاکھ گھر بنانے کا ارادہ ہے، ہاؤسنگ سیکٹر میں بھی چینی سرمایہ کاروں کو خوش آمدید کہیں گے،پچھلی حکومتوں میں مثبت ماحول نہ ہونے کی وجہ سے سرمایہ کاری نہ ہو سکی، چینی سرمایہ کاروں اور شہریوں کے لیے خصوصی سیکیورٹی فورس تشکیل دی ہے۔

عمران خان نے کہا کہ پاکستان کے تمام بڑے اور اہم شہر فضائی ٹریفک سے منسلک ہیں، آج پاکستان ترقی کے ایسے موڑ پر کھڑا ہے جیسے 1978 میں چین تھا، یقین دلاتا ہوں بڑے سرمایہ کاروں کو وزیر اعظم ہاؤس ڈیل کرے گا، ترقی کے لیے میرٹ کی پالیسی اپنانا ہوگی۔