پاکستان پیپلز پارٹی کے چیئرمین بلاول بھٹو زرداری آج عوامی نیشنل پارٹی کے رہنما اسفند یارولی سے ملاقات کریں گے۔

تفصیلات کے مطا بق بلاول بھٹو زرداری نے ملک کی موجودہ سیاسی صورتحال کے پیش نظر سیاسی رہنماؤں سے رابطے تیزکر دیئے ہیں، پیپلز پارٹی کے چیئرمین بلاول بھٹو زرداری اور اسفندیار ولی میں رابطہ ہوا ہے، دونوں رہنماؤں کے درمیان اہم ملاقات آج شام ہوگی، ملاقات میں ملک کی موجودہ سیاسی اور معاشی صورتحال پر تبادلہ خیال کیا جائیگا۔

ملاقات میں مسئلہ کشمیر، افغانستان اور خطے کی صورت حال بھی زیر بحث آئے گی۔

اسفند یار ولی خان کے ہمراہ زاہد خان، میاں افتخار، امیر حیدر ہوتی ہوں گے جبکہ بلاول بھٹو کے ہمراہ یوسف رضا گیلانی، راجہ پرویز اشرف اور فرحت اللہ بابر ہوں گے۔

ذرائع کا یہ بھی کہنا ہے کہ ملاقات میں مولانا فضل الرحمٰن کے آزادی مارچ اور دھرنے پر گفتگو ہو گی۔

واضح رہے کہ مولانا فضل الرحمٰن 27 اکتوبر کو حکومت کے خلاف آزادی مارچ کرنے جارہے ہیں جس پر اپوزیشن کی دو بڑی جماعتوں پی پی اور ن لیگ نے حمایت کا اعلان کیا ہے۔

دوسری جانب مولانا فضل الرحمان نے ملک میں نئے انتخابات کا مطالبہ کر دیا اور کہا کہ پورے ملک سے انسانوں کا سیلاب آ رہا ہے۔

 حکومت تنکوں کی طرح بہہ جائے گی، ہو سکتا ہے 27 اکتوبر سے پہلے ہی تبدیلی آ جائے۔