اپوزیشن کے آزادی مارچ سے قبل وزیراعظم عمران خان نے لاہور کے دورے پر جائیں گے۔

تفصیلات کے مطابق لاہورمیں وزیراعظم کی گورنر محمد سرور اور وزیراعلیٰ پنجاب عثمان بزدار سے ملاقاتیں بھی ہوں گی۔

ذرائع کے مطابق وزیر اعظم عمران خان28  اکتوبر کو ایک روزہ دورے پر لاہور جارہے ہیں جس کے دوران وہ پنجاب کابینہ ارکان سمیت دیگر حکام سے بھی ملاقات کریں گے،امن وامان کے حوالے سے اہم اجلاس کی صدارت کریں گے اوراپوزیشن کے آزادی مارچ کے موقع پر صوبائی حکومت کے انتظامات کا جائزہ لیا جائےگا۔

ذرائع کے مطابق وزیر اعظم عمران خان لاہور میں اہم اجلاسوں کی صدارت بھی کریں گے جبکہ ان کو ہاؤسنگ منصوبوں اور صوبائی محکموں کی کارکردگی پر بریفنگ دی جائے گی۔

وا ضح رہے کہ اس سے قبل وفاقی حکومت نے جمعیت علمائے اسلام ف کی ذیلی تنظیم انصار الاسلام کے اسلام آباد کی حدود میں داخلے پربھی پابندی عائد کردی جبکہ وزارت داخلہ سے جاری ہونے والے مراسلے میں چاروں صوبوں کو انصار الاسلام کے خلاف کارروائی کا اختیار بھی دے دیا گیا ہے۔

وزیراعظم عمران خان نے 21 اکتوبر کو کراچی کا دورہ بھی کیا تھا جس میں انہوں نے گورنر سندھ عمران اسماعیل، پی ٹی آئی کے اراکین اسمبلی اور اتحادی جماعت ایم کیوایم کے رہنماؤں سے ملاقات کی تھی،اس کے بعد وزیراعظم بلوچستان کے شہر حب بھی گئے اور وہاں ‌انہوں نے چین کے تعاون سے بنائے گئے 1320 میگاواٹ کے پاور پلانٹ‌ کا افتتاح اور تقریب سے خطاب کیا تھا.