وزیراعظم عمران خان سے کراچی میں گرینڈ ڈیموکریٹک الائینس اور ایم کیو ایم کے وفد کی الگ الگ ملاقات ہوئی۔

تفصیلات کے مطابق وزیراعظم سے ملاقات میں ایم کیوایم نے فواد چوہدری کے بیان پر تحفظات وزیراعظم کے سامنے رکھ دئیے اور پارٹی دفاترکی واپسی، لاپتہ کارکنان کی بازیابی کا مطالبہ بھی دہرایا،اتحادی جماعت کے تحریری معاہدے پر عملدرآمد میں پیشرفت کا جائزہ بھی لیا گیا، میئر کراچی نے بلدیاتی اختیارات، آرٹیکل 140 اے کے اطلاق کا مطالبہ ، کیا اور کہا کراچی اور حیدرآباد کے لیے ترقیاتی پیکج جلد جاری کیا جائے۔

ذرائع کے مطابق ایم کیو ایم کےوفد میں خالد مقبول،کنور نوید جمیل، وسیم اختر، فیصل سبزواری اور خواجہ اظہار شامل تھے۔

دوسری جانب وزیراعظم عمران خان سے کراچی میں گرینڈ ڈیموکریٹک الائینس کے وفد  نےبھی ملاقات کی، وفد میں سینیٹر مظفر حسین شاہ، ممبر قومی اسمبلی غوث بخش مہر، ممبران سندھ صوبائی اسمبلی محترمہ سائرہ بانو ، علی نواز شاہ، عبدالرزاق، علی غلام، علی گوہر خان مہر، عارف مصطفی جتوئ، حسنین علی مرزا، محمد رفیق شریک تھے۔

جی ڈی اے کے وفد نے اپنے حلقوں میں درپیش مسائل سے وزیر اعظم کو آگاہ کیا وزیر اعظم نے وفد کو یقین دہانی کرائی کہ احساس اور صحت انصاف پروگرامز کو اندرون سندھ تک وسعت دی جائے گی۔

واضح رہے کہ وزیراعظم عمران خان ایک روزہ دورے پر کراچی پہنچے تو ایئرپورٹ پر چیف سیکرٹری اور آئی جی سندھ نے وزیراعظم کا استقبال کیا، وفاقی وزیر اعظم سواتی، خسرو بختیار، فیصل واوڈا، معاون خصوصی ندیم بابر، اسد عمر بھی وزیراعظم کے ہمراہ ہیں۔