جے یو آئی ف کے سربراہ مولانا فضل الرحمان نے کہا ہے کہ ڈی چوک ہماری منزل نہیں، ہم حکومت گرا کر خود انتظام سنبھالیں گے۔

تفصیلات کے مطا بق جے یو آئی ف کے سربراہ مولانا فضل الرحمان نے وفاقی دارالحکومت اسلام آباد میں جلسے کے شرکا سے خطاب کرتے ہوئے کہا کہ ڈی چوک ہماری منزل نہیں ہے ہم حکومت گرا کر خود انتظام سنبھالیں گے۔

ذرائع کے مطا بق سربراہ مولانا فضل الرحمان نے کہا کہ حکومت کی رٹ ختم ہو چکی ہے اور اب یہ ہمارے ہاتھ میں ہے،موجودہ حکمران ملک کے لیے رسک بن چکے ہیں،کرسی پر بیٹھنے سے کوئی حکمران نہیں بن جاتا،

حکومت حزب اختلاف کے صبر کا مزید امتحان نہ لے اور وزیر اعظم عمران خان فوراً مستعفیٰ ہو جائیں۔

سر براہ جے یو آئی ف نے کہا کہ حکومت اپنا معاہدہ توڑ چکی ہے اور ہم ابھی تک معاہدے پر قائم ہیں، 126 دن کا دھرنا ہمارے لیے کوئی آئیڈیل نہیں ہمارا احتجاج ایک تحریک ہے،افواہیں پھیلائی جا رہی ہیں کہ حزب اختلاف میں دراڑ ہے لیکن رہبر کمیٹی کے اجلاس نے یکجہتی کا پیغام دیا۔ رہبر کمیٹی نے کہا ہے کہ ڈی چوک جانے کی تجویز بھی زیر غور ہے۔

انھو ں نے کہا کہ حکومت نے ہر طرف کنٹینر لگا رکھے ہیں ہمیں بتائیں کہ مذاکرات کے لیے راستہ کہاں سے کھلا ہے۔

مولانا فضل الرحمان کا کہنا تھا کہ بھارت نے پہلے ہمت نہیں کی لیکن موجودہ حکومت کے دور میں کشمیر بھی ہم سے چھین لیا گیا۔

ناکام خارجہ پالیسی کی وجہ سے کشمیر کے مسئلے پر کسی نے پاکستان کی حمایت نہیں کی۔

آزادی مارچ کے شرکاء سے خطاب کرتے ہوئےمولانا فضل الرحمٰن نے کہا کہ تحریک انصاف کی حکومت کو کہا تھا کہ اپنی آئینی حیثیت ٹھیک کر لو، استعفیٰ دے دو، رہبر کمیٹی کے اجلاس میں آج کے اجلاس کے عوام کے مطالبے کے ساتھ متفق کیا ہے۔

ذرائع کے مطابق دھرنے میں شریک تین بڑی جماعتوں مسلم لیگ ن، پی پی پی اور اے این پی نے استعفوں، لاک ڈاؤن اور دھرنے کی تجویز سے اختلاف کیا تاہم رہبر کمیٹی میں مزید غور ہوگا۔