خواجہ آصف نے کہا ہے کہ نوازشریف زندگی اور موت کی جنگ لڑ رہے ہیں، نوازشریف کی جان کو شطرنج کا مہرہ نہ بنائیں۔

تفصیلات کے مطابق قومی اسمبلی کے اجلاس سے خطاب کرتے ہوئے ن لیگی رہنما خواجہ آصف کا کہنا ہے کہ سا بق وزیراعظم نواز شریف باہر نہیں جانا چاہتے، آج بھی کہتا ہوں وہ بیرون ملک گئے تو واپس ضرور آئیں گے۔

خواجہ آصف کا کہنا ہے کہ نوازشریف کا راستہ اگر روکا تو آپ یہاں بھی جواب دیں گے اور آگے بھی جواب دینا پڑے گا،نوازشریف کو عدالتوں نے ریلیف دیا۔

ن لیگی رہنما نے کہا کہ نواز شریف بیرون ملک نہیں جانا چاہتے، والدہ اور فیملی کے دباو پر باہر علاج کروانے پر رضا مندی ظاہر کی، ڈاکٹرز نے انہیں کہا کہ جتنا علاج یہاں کر سکتے تھے کر دیا، ہمارے پاس ٹیکنالوجی موجود نہیں، ہیوسٹن کے ہسپتال میں جا کر علاج کروائیں جہاں ایک چھت تلے سب سہولیات میسر ہوں گی۔

خواجہ آصف نے خطا ب کر تے ہوئے کہا کہ نوازشریف کا سب کچھ پاکستان میں ہے،سیاستدان کی سب سے بڑی جائیداد اس کی سیاست ہوتی ہے، موجودہ حکمرانوں میں بدلےکی آگ بھڑک رہی ہے، قانون سازی کا جو مذاق اڑایا گیا چند روز قبل سب نے دیکھ لیا۔
انھوں نے کہا کہ فروغ نسیم کےبیانات مشرف اور نوازشریف کیلئے مختلف ہیں،واشنگٹن میں کہا گیا کہ میں ان سے اے سی، فریج واپس لے لوں گا، وزارت عظمیٰ کا عہدہ رکھنے والے کو ایسی باتیں زیب نہیں دیتیں، بڑے عہدے پر بڑی باتیں کی جاتی ہیں، چھوٹی نہیں، آپ کو نوازشریف کے ضامن کی ضرورت ہے تو ہم یہاں ضامن بیٹھے ہیں، نوازشریف کو اجازت دیں قسم کھا کر کہتا ہوں واپس آئیں گے۔